अनधिकृत होर्डिंगमुळे परिसर बकाल

नेरूळ (बातमीदार) : नेरूळ सेक्टर सहा परिसरात अनधिकृत होर्डिंगचा विळखा पाहावयास मिळत आहे. विशेष म्हणजे महापालिकेचे नेरूळ विभाग कार्यालय हाकेच्या अंतरावर असतानाही अतिक्रमण नियंत्रण विभाग संबंधित अनधिकृत बॅनर, होर्डिंगचा खतपाणी घालत असल्याचा आरोप रहिवाशांकडून करण्यात येत आहे. अनधिकृत बॅनर व होर्डिंगमुळे पालिकेचा महसूल बुडत असतानाही अतिक्रमण नियंत्रण विभाग कारवाई करीत नसल्याने नागरिकांकडून आश्चर्य व्‍यक्‍त करण्यात येत आहे. विशेष म्हणजे नेरूळ सेक्टर सहामध्ये महापालिकेच्या नेरूळ सिव्ह्यू उद्यानामधून जाहिराती लावण्याचे लोखंडी कमान आहे. या ठिकाणी केवळ आरोग्य विभागाचे जनजागृतीपर बॅनर व होर्डिंग लागले जातात, तसा उल्लेखही त्या ठिकाणी आहे. तेथे होर्डिंग व बॅनर लावणाऱ्यांवर कारवाई केली जाईल, असे नमूदही तेथे करण्यात आले आहे. मात्र राजरोसपणे तेथे खासगी बॅनर, होर्डिंग लावले जातात. पालिकेचे अतिक्रमण विभाग कारवाई करीत नसल्याने रोष व्‍यक्‍त करण्यात येत आहे. नेरूळ सेक्टर सहामधील अंतर्गत व बाह्य भागातील बॅनर व होर्डिंग तातडीने हटविण्याचे निर्देश द्यावेत आणि आजवर अनधिकृत बॅनर तसेच होर्डिंग लावणाऱ्यांविरोधात काय कारवाई केली, किती जणांवर फौजदारी गुन्हे दाखल केले आहेत, याची लेखी माहिती मागवून घेण्याची मागणी संदीप खांडगेपाटील यांनी महापालिका आयुक्तांकडे केली आहे.
..........
नेरूळ रेल्वे स्थानक परिसरातील अतिक्रमणावर कारवाई
नेरूळ (बातमीदार) : सिडकोच्या सुरक्षा विभागाने नेरूळ रेल्वेस्‍थानक परिसरात फेरीवाले, गाळाधारक, गर्दुल्ले आणि अनधिकृतरीत्या पार्क करणाऱ्या वाहनांवर कारवाई करून परिसर स्वच्छ केला आहे. त्यामुळे येथील रस्ते, पदपथांनी मोकळा श्वास घेतला आहे. सिडकोचे मुख्य दक्षता अधिकारी सुरेश मेंगडे यांच्या मार्गदर्शनाखाली विशेष मोहीम राबवत ही कारवाई करण्यात आली. सिडकोकडून नवी मुंबईतील रेल्वे स्थानक परिसरात अनधिकृत अतिक्रमण, फेरीवाले, गर्दुल्ले यांच्यावर नियमित कारवाई केली जाते. मागील आठवड्यातदेखील सिडको सुरक्षा अधिकारी आणि रक्षकांच्या मदतीने पादचारी पूल, रेल्वेस्‍थानकाच्या दोन्ही बाजूंना असलेले अनधिकृत फेरीवाले, गाळाधारक आणि गर्दुल्ल्यांना हटवण्यात आले. या वेळी स्‍थानकाच्या आजूबाजूला पार्क करण्यात आलेली अनधिकृत वाहनेदेखील हटवण्यात आली. या कारवाईमुळे प्रवाशांनी समाधान व्यक्त केले. तर अशाप्रकारे नेरूळ रेल्‍वेस्‍थानक परिसर स्वच्छ ठेवण्यात यावा, अशी अपेक्षा व्यक्त केली. रेल्वेस्थानकावर किंवा परिसरात फेरीवाले, गर्दुल्ले किंवा अनधिकृतपणे माल साठवणारे गाळाधारक दिसल्यास नागरिकांनी त्याची तक्रार www.cidco. maharashtra.gov.in या संकेतस्थळावर नोंदवावी, असे आव्हान सिडकोकडून करण्यात आले आहे.