भरधाव ट्रकच्या धडकेत दुचाकीस्वार ठार

मुरबाड, ता. ६ (बातमीदार) : कल्याण-नगर राष्ट्रीय महामार्गावर उमरोली गावाच्या हद्दीत भरधाव ट्रकने दुचाकीला धडक दिल्याची घटना घडली. यामध्ये एका दुचाकीस्वाराचा मृत्यू झाला तर दुसरा जखमी झाला. ही घटना रविवारी (ता. ६) सकाळी घडली. मयूर नारायणदास सुहानंद (वय २२) असे मृताचे नाव आहे, तर यामध्ये राजगोपाल अहुजा (२५) हा गंभीर जखमी झाला. उल्हासनगर येथील हे दोघे तरुण दुचाकीने माळशेज घाटाकडे निघाले होते. उमरोली येथील राष्ट्रीय महामार्ग पोलिस चौकीच्या समोर या दोघांंच्या दुचाकीला समोरून आलेल्या ट्रकने धडक दिली. या भीषण अपघातात दुचाकीच्या पाठीमागे बसलेला मयूर सुहानंद हा जागीच ठार झाला. तर दुचाकीचालक राजगोपाल हा जखमी झाला. मयूरचा मृतदेह उत्तरीय तपासणीसाठी टोकावडे ग्रामीण रुग्णालयात पाठविण्‍यात आला, त्यानंतर तो नातेवाइकांच्या ताब्यात देण्यात आला.