कोयना एक्स्प्रेसमध्ये चढताना महिलेचा अपघाती मृत्यू

कर्जत, ता. ६ (बातमीदार) : कर्जत रेल्वेस्थानकात कोयना एक्स्प्रेसमध्ये चढताना एका ४२ वर्षांच्या महिलेचा अपघाती मृत्यू झाला. ही घटना रविवारी (ता. ६) सकाळी दहा वाजून ५० मिनिटांनी फलाट क्रमांक एकवर घडली. रफत जहान उस्मान शेख या महिलेचे नाव असून त्या भिवंडी येथे वास्तव्यास होत्या. त्यांची बहीण अमीना अबुतल्ला शेख यांनी ओळख पटवून दिली. त्या चिंचवड येथे राहतात.

मिळालेल्या माहितीनुसार, रफत जहान शेख या मुंबईहून कोल्हापुराला जाणाऱ्या कोयना एक्सप्रेसच्या पाठीमागील दुसऱ्या डब्यात चढत असताना त्यांचा पाय घसरला आणि त्या फलाट व गाडीच्या पोकळीमध्ये पडल्या. त्यामुळे त्यांच्या डाव्या मांडीला गंभीर दुखापत झाली. घटनास्थळी उपस्थित कर्मचाऱ्यांनी तत्काळ त्यांना उपजिल्हा रुग्णालय कर्जत येथे नेले; मात्र तेथील डॉक्टरांनी साडेअकरा वाजण्याच्या सुमारास त्यांना मृत घोषित केले. त्यांच्या डाव्या मांडीवर खोल जखम होऊन रक्तस्राव झाल्याचे आढळून आले. मृतदेहाची ओळख पटवून, सर्व कायदेशीर प्रक्रिया पूर्ण करून मृतदेह नातेवाइकांच्या ताब्यात देण्यात आला असून या घटनेबाबत कर्जत रेल्वे पोलिस ठाण्यात अपमृत्यूची नोंद करण्यात आली आहे.