महिलेला सव्वा कोटींचा गंडा
सकाळ वृत्तसेवा
ठाणे, ता. ६ : ठाणे शहरातील एका उच्चभ्रू वस्तीतील एका महिलेला सुमारे सव्वा कोटींचा ऑनलाइन गंडा घातल्याची घटना घडली आहे. याप्रकरणी कासारवडवली पोलिस ठाण्यात दोघांविरोधात गुन्हा दाखल झाला आहे. हिरानंदानी इस्टेटमध्ये राहणाऱ्या तक्रारदार या बिझनेस ॲनालिस्ट आहेत. त्यांना फेसबुकवर शेअर मार्केटसंदर्भात जाहिरात दिसली. तिथेच एक लिंक दिसली. त्यावर जॉइण्ट असे लिहिले होते. त्याच्या क्लिक करून ग्रुपमध्ये सहभागी होण्यास सांगितले, त्यानुसार त्या ग्रुपवर सहभागी झाल्या. ग्रुप ॲडमिन रोहन महेश्वरी आणि फायनान्शियल ॲडव्हायझर विद्या सिंग यांनी संपर्क केला. ट्रेडिंग ॲप्लीकेशनबद्दल माहिती देत त्यातून जास्त पैशांचे प्रलोभन दाखवले. तसेच लिंकद्वारे व्हॉटसॲप ग्रुपमध्ये वेगवेगळ्या बँकांच्या खात्यांवर पैसे पाठविण्यास सांगितले. त्यांच्याकडून त्यांनी एक कोटी २३ लाख २९ हजार ९९५ अशी रक्कम घेतली; मात्र त्याचा परतावा केला नाही, त्यामुळे फसवणूक झाल्याचे लक्षात आल्यावर त्यांनी कासारवडवली पोलिस ठाण्यात तक्रार दाखल केली. हा प्रकार २६ डिसेंबर २०२४ ते १२ जानेवारी या कालावधीत घडला.