हार्बर रेल्वे बिघाडामुळे ठप्प
मेगाब्लॉक त्यातच सीवूड्स ते नेरूळदरम्यान तांत्रिक बिघाड

नवी मुंबई, ता. ६ (वार्ताहर) : हार्बर मार्गावरील लोकल सेवा पाच तासांच्या मेगाब्लॉकमुळे रविवारी (ता. ६) दुपारी बंद असताना, ऐन सायंकाळच्या सुमारास सीवूड्स ते नेरूळदरम्यान तांत्रिक बिघाड झाल्यामुळे सायंकाळच्या सुमारास हार्बर मार्गावरील वाशी ते सीबीडी बेलापूर यादरम्यानची लोकल सेवा चार तासांपेक्षा अधिक काळ ठप्प होती. या मार्गावरील लोकल सेवा रात्री आठ वाजल्यानंतर सुरळीत सुरू झाली. या प्रकारामुळे हार्बर मार्गावरून प्रवास करणाऱ्या प्रवाशांना नाहक मनस्ताप सहन करावा लागला.

हार्बर रेल्वे मार्गावर रविवारी दुरुस्तीच्या कामासाठी वाशी ते पनवेलदरम्यान मेगाब्लॉक घेण्यात आला होता. त्यामुळे वाशी ते पनवेल या मार्गावरील लोकल सेवा सकाळी ११.०५ ते सायंकाळी ४.०५ या कालावधीत बंद ठेवण्यात आली होती. या मेगाब्लॉकदरम्यान सीवूड्स रेल्वेस्थानकाजवळ रेल्वेची दुरुस्ती व्हॅन तांत्रिक बिघाडामुळे बंद पडली. त्यामुळे रेल्वे प्रशासनाकडून मेगाब्लॉक एक तासाने वाढवण्यात आला होता. त्यानंतर रेल्वे प्रशासनाकडून तांत्रिक बिघाड दुरुस्तीचे काम युद्धपातळीवर सुरू करण्यात आले होते. अखेर रात्री आठनंतर काम पूर्ण झाल्यानंतर या मार्गावरील लोकल सेवा सुरू करण्यात आली. दरम्यानच्या काळात मेगाब्लॉक संपल्यानंतर सायंकाळी चार वाजण्याच्या सुमारास सीएसएमटी ते वाशी तसेच सीबीडी बेलापूर ते पनवेल आणि ठाणे ते नेरूळ या मार्गावर लोकल सेवा सुरू करण्यात आली होती; मात्र तांत्रिक बिघाडामुळे वाशी ते बेलापूर यादरम्यानची लोकल सेवा बंद ठेवण्यात आली होती.

मेगाब्लॉक आणि त्यानंतर तांत्रिक बिघाडामुळे दुरुस्ती व्हॅन बंद पडल्याने रविवारी दिवसभर हार्बर रेल्वे मार्गावरील लोकल सेवा विस्कळित होऊन ठप्प राहिली. त्यामुळे या मार्गावरून प्रवास करणाऱ्या प्रवाशांना पर्यायी वाहनांचा आधार घ्यावा लागला.