किन्हवली (बातमीदार)ः जिल्हा परिषदेच्या खराडे केंद्रशाळेने आषाढी एकादशीचे औचित्य साधून विविध सांस्कृतिक कार्यक्रम सादर केले. यानिमित्ताने पारंपरिक वेशभूषेतील विद्यार्थ्यांनी प्रबोधन वारी काढली होती. या वेळी विद्यार्थ्यांनी संत तुकाराम, संत ज्ञानेश्वर, विठोबा-रखुमाई, वारकरी अशा विविध वेशभूषा साकारल्या होत्या. टाळ, मृदंग, अभंग गायन, भजनांमुळे प्रबोधन वारीने ग्रामस्थ मंत्रमुग्ध झाले. या वेळी जनजागृती रॅलीत पर्यावरण, वृक्षारोपण, स्वच्छता, मूल्यशिक्षणावर पथनाट्य सादरीकरणातून सामाजिक संदेश देण्यात आला.