अंधेरी, ता. ७ (बातमीदार)ः क्षुल्लक कौटुंबिक वादातून शुक्रवारी (ता. ४) रात्री रागाच्या भरात रेश्मा राठोड (२७) महिलेची हत्या करण्यात आली होती. या घटनेतील आरोपी पतीने पोलिसांकडे समर्पण केल्यानंतर हा गुन्हा उघडकीस आला होता.
बोरिवलीतील न्यू लिंक रोड, गणपत पाटील झोपडपट्टीत राहणारा पप्पू राठोड (३२) याने कौटुंबिक वादातून पत्नीची हत्या केली होती. पप्पूने रेश्माच्या डोक्यात ग्रेनाईट कटरने हल्ला केला होता. तसेच ओढणीने तिची गळा आवळून हत्या केली होती. हत्येनंतर त्याने एमएचबी पोलिस ठाण्यात समर्पण करताना उपस्थित पोलिसांना घडलेला प्रकार सांगितला. त्यानंतर घटनास्थळी दाखल पोलिसांनी रेश्माला शताब्दी रुग्णालयात दाखल केले; मात्र तिला डॉक्टरांनी मृत घोषित केले. याप्रकरणी हत्येचा गुन्हा दाखल करून पोलिसांनी आरोपी पप्पू राठोडला अटक केली. रविवारी दुपारी त्याला बोरिवलीतील स्थानिक न्यायालयात हजर केले जाणार असल्याचे वरिष्ठ पोलिस निरीक्षक गणेश पवार यांनी सांगितले.