मनसेचे डोंबिवलीत आंदोलन
सकाळ वृत्तसेवा
डोंबिवली, ता. ७ : महापुरुषांचा उल्लेख करताना शिवसेना शिंदे गटाचे आमदार संजय गायकवाड यांनी केलेल्या बेताल आणि वादग्रस्त वक्तव्यामुळे राज्यभरात संतप्त प्रतिक्रिया उमटत आहेत. याच पार्श्वभूमीवर डोंबिवलीत मनसेच्या कार्यकर्त्यांनी आंदोलन करत आमदार गायकवाड यांच्या वक्तव्याचा निषेध केला. राज ठाकरे आणि उद्धव ठाकरे हे एकत्र आल्यानंतर त्यांच्यावर टीका करताना आमदार संजय गायकवाड त्यांनी अपशब्द वापरले. मराठी भाषेच्या मुद्द्यावर बोलताना त्यांनी छत्रपती संभाजीराजे आणि शिवरायांबद्दलही अपशब्द वापरले. आमदार गायकवाड यांच्या या वक्तव्यानंतर वाद पेटला आहे.
सोमवारी (ता. ७) डोंबिवली पूर्वेतील इंदिरा चौकात महाराष्ट्र नवनिर्माण सेनेचे पदाधिकारी जिल्हाध्यक्ष प्रकाश भोईर, माजी नगरसेविका मंदा पाटील, पदाधिकारी सुदेश चूडनाईक, नीलिमा भोईर, अरुण जांभळे, निषाद पाटील, रमा म्हात्रे यांच्यासह अनेक कार्यकर्त्यांनी निषेध आंदोलन केले. आंदोलनादरम्यान कार्यकर्त्यांनी जोरदार घोषणाबाजी करत संजय गायकवाड यांनी माफी मागावी, अशी मागणी केली. रामनगर पोलिसांनी तत्काळ घटनास्थळी हस्तक्षेप करत आंदोलन करणाऱ्या मनसे पदाधिकारी आणि कार्यकर्त्यांना ताब्यात घेतले; मात्र काही वेळाने त्यांना सोडून देण्यात आले.