जव्हार (बातमीदार) : मुसळधार पाऊस, सोसाट्याचा वारा असणाऱ्या जव्हार भागात गेल्या दोन दिवसांत १५७ मिमी पावसाची नोंद झाली आहे. संततधारेमुळे येथील जनजीवन विस्कळित होऊन १५ पेक्षा अधिक गाव-पाड्यांचा संपर्क तुटला आहे.

हवामान विभागाने इशारा दिलेला असल्याप्रमाणे शनिवारी (ता. ५) आणि रविवारी (ता. ६) दिवसभर पावसाची हजेरी राहिली होती. शहरासह ग्रामीण भागात दिवसभर पाऊस सुरू होता. आज (ता. ७) सकाळपासून ढग दाटलेले असताना ११ वाजण्याच्या सुमारास रिमझिम पावसाला सुरुवात झाली. अवघ्या काही मिनिटांमध्ये पावसाने जोर पकडला होता. दुपारपर्यंत सातत्याने पाऊस बरसल्यानंतर काहीवेळ विश्रांती घेत पावसाला पुन्हा सुरुवात झाली. सायंकाळी उशिरापर्यंत पावसाचा जोर कायम होता.

शाळा, महाविद्यालयाला सुट्टी
पालघर जिल्हाधिकारी डॉ. इंदुराणी जाखड यांनी हवामान विभागाच्या अंदाजानुसार, अतिवृष्टीचा फटका पालघर जिल्ह्यातील विद्यार्थ्यांना होऊ नये, म्हणून सोमवारी (ता. ७) सुट्टी जाहीर केली होती.

माड विहीरा, हुंबरन गावांचा संपर्क तुटला
शुक्रवारपासून सुरू असलेल्या मुसळधार पावसामुळे जव्हार तालुक्यातील १५ पेक्षा अधिक गावांचा संपर्क काही तासांसाठी तुटला होता. यात विशेषकरून माड विहिरा, हुंबरन या गावांचा समावेश होता.

कमाल तापमान खालावले
पावसामुळे वातावरणात गारवा निर्माण झाला आहे. त्यामुळे जुलैमध्ये सतत पाऱ्यामध्ये घसरण नोंदविली जाते आहे. विशेषतः दिवसाच्या वेळी सूर्य ढगांमध्ये झाकोळला जात असल्याने कमाल तापमानदेखील खालावले आहे.

रस्त्यावरील खड्डे वाढले
पावसामुळे शहरातील रस्त्यांवर खड्डे पडले आहेत. त्यामध्ये पाणी साचत असल्याने बऱ्याच वेळा चालकांना अंदाज येत नसल्याने वाहन जोरात आदळण्याच्या घटना वाढल्या आहेत. खड्ड्यांचा प्रश्न बिकट बनला असून, त्यावर तोडगा काढण्याची मागणी होते आहे.

जव्हार तालुक्यातील पाऊस (मिमी)
जव्हार मंडळ १९३
साखरशेत मंडळ १४२
जामसर मंडळ १३६