अलिबागमध्ये आषाढी वारीचा अनुभव
सामाजिक संस्था, जिल्हा प्रशासनाचा पुढाकार
अलिबाग, ता. ७ (वार्ताहर) ः आषाढी एकादशीनिमित्त अलिबागकरांनी पंढरपूरच्या आषाढी वारीचा अनुभव घेतला. उज्ज्वल भविष्य सामाजिक संस्था, माणुसकी प्रतिष्ठान यांच्या पुढाकाराने ‘एक दिवस तरी वारी अनुभवावी’ हा कार्यक्रम उत्साहात पार पडला.
आषाढी एकादशीनिमित्त ज्‍यांना पंढरपूरच्या वारीत कामानिमित्त सहभागी होता येत नाही, अशा भाविकांना वारीचा अनुभव देण्यासाठी अलिबागमधील अनेक सामाजिक संस्‍था तसेच जिल्‍हा प्रशासनाकडून वारीचे आयोजन करण्यात आले होते. यामध्ये जिल्हाधिकारी कार्यालय, तहसील कार्यालय, रायगड पोलिस अधीक्षक कार्यालय, लायन्स क्लब ऑफ अलिबाग, लायन्स क्लब ऑफ मांडवा, लायन्स क्लब ऑफ डायमंड, लायन्स क्लब श्रीबाग, रोटरी क्लब ऑफ अलिबाग, तेजस्विनी फाउंडेशन, अँटी करप्शन फाउंडेशन ऑफ इंडिया, प्रिझम सामाजिक संस्था, वेदांत बहुउद्देशीय सामाजिक संस्था, धर्मराज बहुउद्देशीय सामाजिक संस्था, जन शिक्षण संस्थान, रायगड जिल्हा शिक्षण विभाग, शिक्षणाधिकारी, रायगड प्रीमियर लीग, रायगड जिल्हा क्रिकेट असो. तसेच इतर सामाजिक स्वयंसेवी संस्था यांनी सहभाग घेतला होता. माजी नगराध्यक्ष प्रशांत नाईक यांनी पालखी व विठ्ठल मंदिर उपलब्ध करून दिले. माथाडी कामगार व सहकारी या सर्वांच्या सहयोगाने अलिबागमध्ये वारीसाठी प्रभा गृह उद्योग अध्यक्षा रत्नप्रभा बेल्हेकर यांनी संपूर्ण वारीतील सहभागी भाविकांना चहा, नाष्टा, टोपी दिल्या. पंजाब नॅशनल बँकेचे मॅनेजर अविनाश आलते यांनी सर्वांना केळी उपलब्ध करून दिली. पांडुरंगाची वारी शहरातील छत्रपती शिवाजी महाराज चौकमार्गे विठ्ठल मंदिरातून निघाली. त्‍यानंतर पुढे बालाजी मंदिर, दत्त मंदिर, गणेश मंदिर, राम मंदिर, अलिबाग एसटीस्थानकमार्गे रामनाथ रोडने वरसोली विठ्ठल मंदिरापर्यंत पोहोचली. या वारीमध्ये हरिनामाच्या जयघोषासह स्वच्छतेचा संदेश, वृक्षारोपण व वृक्ष संवर्धन, प्लॅस्टिकमुक्त भारत, उत्तम आरोग्य, यासंबंधीचे जयघोष करण्यात आले.