बिम्सटेक देशांसाठी कॅन्सरचे प्रशिक्षण
उपचाराची गुणवत्ता वाढवण्यासाठी महत्त्वपूर्ण उपक्रम

सकाळ वृत्तसेवा
मुंबई, ता. ७ : बिम्सटेक शिखर परिषदेत पंतप्रधानांनी केलेल्या घोषणेनुसार बिम्सटेक देशांसाठी कॅन्सर केअरमध्ये विशेष प्रशिक्षण कार्यक्रमाला ७ जुलै रोजी टाटा स्मारक केंद्रात सुरुवात झाली. भारत सरकारच्या परराष्ट्र मंत्रालयाच्या वतीने आणि अणुऊर्जा विभागाच्या सहकार्याने सुरू झालेल्या या उपक्रमात बांगलादेश, म्यानमार, भूतान आणि नेपाळमधील प्रतिनिधी सहभागी झाले आहेत.
या प्रशिक्षणाचे उद्घाटन अणुऊर्जा आयोगाचे अध्यक्ष डॉ. ए. के. मोहंती यांच्या हस्ते झाले असून, चार आठवड्यांच्या या कार्यक्रमात रेडिएशन ऑन्कोलॉजी, न्युक्लिअर मेडिसिन आणि रेडिओलॉजी या विषयांवर प्रत्यक्ष प्रशिक्षण दिले जात आहे.
“आमच्या संस्थेला वैद्यकीय सेवा, शिक्षण आणि संशोधनाचा व्यापक अनुभव आहे. तोच अनुभव बिम्सटेक देशांमधील कॅन्सर केअर सुधारण्यासाठी वापरला जात आहे. हा उपक्रम केवळ प्रशिक्षणापुरता मर्यादित नसून, आरोग्य क्षेत्रातील प्रादेशिक सहकार्याचा एक महत्त्वाचा टप्पा ठरेल.” असे टाटा स्मारक केंद्राचे संचालक डॉ. सुदीप गुप्ता म्हणाले.
होमी भाभा कॅन्सर रुग्णालयाचे संचालक डॉ. उमेश महंतशेट्टी यांनी सांगितले की, प्रशिक्षणात संवादात्मक सत्रे, क्लिनिकल निरीक्षण आणि मार्गदर्शन यांचा समावेश आहे. हा उपक्रम बिम्सटेक देशांमध्ये कॅन्सर उपचाराची गुणवत्ता वाढवण्यासाठी महत्त्वपूर्ण ठरणार आहे.