वाहनाच्या धडकेत टेम्पोचालकाचा मृत्यू

नवी मुंबई, ता. ७ (वार्ताहर) : भिवंडीहून द्रोणागीरी येथे कुरिअर घेऊन जाणाऱ्या टेम्पोचालकाला अज्ञात वाहनाने धडक दिल्याची घटना रविवारी (ता. ६) सकाळी उरणमधील सोनारी पुलावर घडली. यामध्ये टेम्पोचालकाचा मृत्यू झाला. उरण पोलिसांनी या अपघाताप्रकरणी अज्ञात वाहनचालकाविरोधात गुन्हा दाखल करून त्याचा शोध सुरू केला आहे.
संदीप श्रीराम सरोज (वय ४२) असे या अपघातातील मृताचे नाव असून, तो भिवंडी येथे राहण्यास होता. तो उरण-द्रोणागीरी येथील शॅडोफॅक्स टेक्नोलॉजी प्रा.लि. या कुरिअर कंपनीत गेल्या सहा महिन्यांपासून काम करत होता. संदीप भिवंडी व ठाणे येथील कुरिअर घेऊन द्रोणागीरी येथील कंपनीच्या कार्यालयात पोहोचवत होता. नेहमीप्रमाणे तो रविवारी पहाटे कंपनीच्या टेम्पोमधून भिंवडी येथील कुरिअर घेऊन द्रोणागीरी येथे येत होता. सकाळी साडेपाच वाजण्याच्या सुमारास संदीप टेम्पो घेऊन सोनारी येथील पुलाजवळ आला असता त्याच्या वाहनाला पाठिमागून अज्ञात वाहनाने धडक दिली. त्यामुळे त्याचा टेम्पो रस्त्यामधील दुभाजकाला धडकला. या अपघातात संदीपचा मृत्यू झाला. या अपघातानंतर उरण पोलिसांनी घटनास्थळी धाव घेऊन संदीपचा मृतदेह पुढील कार्यवाहीसाठी इंदिरा गांधी ग्रामीण रुग्णालयात पाठविला आहे.