बंद घराला आग; घराचे मोठ्या प्रमाणात नुकसान
सकाळ वृत्तसेवा
ठाणे, ता. ८ : हीबा अपार्टमेंट या इमारतीमधील रूम १०४ मध्ये मंगळवारी (ता. ८) सकाळी आग लागली. या आगीत घराचे मोठ्या प्रमाणात नुकसान झाले असून, कोणालाही दुखापत झालेली नाही, अशी माहिती आपत्ती व्यवस्थापन विभागाने दिली. घरमालक सलीम फिरदोस यांचे कुटुंब बाहेरगावी गेले होते. त्यामुळे घर बंद होते.
शिळफाटा, भोलेनाथ मंदिराच्या जवळील हीबा अपार्टमेंट या तळ अधिक एक मजली इमारतीमधील रूम क्रमांक १०४ या रूममध्ये आग लागल्याची माहिती गायकवाड नामक व्यक्तीने ठाणे महापालिकेचे आपत्ती व्यवस्थापन कक्षाला दिली. या घटनेची माहिती मिळताच घटनास्थळी अग्निशमन दलाच्या जवानांनी धाव घेतली. त्या वेळी लागलेली आग स्थानिक रहिवासी व अग्निशमन दलाच्या जवानांनी पूर्णपणे नियंत्रणात आणली. या घटनेत कोणालाही दुखापत झाली नसली तरी या लागलेल्या आगीमध्ये रूममधील कपडे, लाकडी कपाट, फ्रिज, घरातील इतर प्लॅस्टिक साहित्य व इलेक्ट्रिक वायरिंग इत्यादी पूर्णपणे जळाले आहे.