सकाळ वृत्तसेवा
नवी मुंबई, ता. ८ ः नागरिकांच्या विरंगुळ्याकरिता सीवूड्समध्ये तयार केलेले उद्यान अद्याप नागरिकांकरिता खुले केलेले नाही. अभियांत्रिकी विभागाने उद्यानाचे काम पूर्ण करून सहा महिने लोटले आहेत; मात्र उद्यान विभागातर्फे तपासणीच्या नावाखाली वेळकाढूपणा चालवला आहे. दोन्ही विभागांच्या अंतर्गत वादामुळे नागरिक उद्यान खुले होण्याच्या प्रतीक्षेत आहेत.
नेरूळ विभागात मोडणारा सीवूड्स हा सर्वात मोठा रहिवासी परिसर आहे. या भागात अनेक शाळा व महाविद्यालये आहेत. तसेच प्रत्येक सेक्टरनिहाय महापालिकेने उद्यान विकसित केले आहे. जुन्या सेक्टरमध्ये याआधीच उद्याने तयार करण्यात आली असली तरी नवीन सेक्टरमध्ये आता उद्यानांचा विकास करण्यात येत आहे. सेक्टर ३८ येथे रस्त्यालगत भूखंड क्रमांक ८, ९ आणि १० या ठिकाणी अद्ययावत उद्यान तयार केले आहे. हे उद्यान तयार होऊन सहा महिने झाले असून याठिकाणी वॉकिंग ट्रॅक आणि मुलांना खेळण्यासाठी हरित पट्टे तयार केले आहेत; मात्र हे उद्यान अद्याप नागरिकांकरिता खुले करण्यात आलेले नाही. त्यामुळे रहिवाशांमधून महापालिकेवर नाराजी व्यक्त होत आहे.
उद्यानाचे काम अभियांत्रिकी विभागातर्फे झाली आहे. हे काम पूर्ण झाल्यानंतर उद्यानाचे हस्तांतर विभागाकडे होणे गरजेचे आहे; मात्र हस्तांतर प्रक्रिया रखडल्याने सहा महिन्यांपासून उद्यान खुले होत नसल्याची तक्रार भाजपचे माजी नगरसेवक भरत जाधव यांनी महापालिकेकडे केली आहे. तसेच वेळेवर उद्यान खुले न केल्यास महापालिकेविरोधात ठिय्या आंदोलन करण्याचा इशारा जाधव यांनी दिला आहे.

उद्यानाचे काम झाल्यानंतर काही दिवसांपूर्वीच अभियांत्रिकी विभागातर्फे आमच्या विभागाकडे फाइल आली आहे. फाइलनुसार कोणती कामे झाली आहेत, हे तपासण्यासाठी अधिकाऱ्यांना सूचना देण्यात आल्या आहेत. अधिकाऱ्यांनी उद्यानाचे काम तपासून अहवाल सादर केल्यावर लवकरच उद्यान खुले करण्यात येईल.
- किसनराव पलांडे, उपायुक्त, उद्यान विभाग, नवी मुंबई महापालिका