भाईंदर (बातमीदार) : परोपकार संस्थेच्या भाईंदर समितीकडून आर्थिकदृष्ट्या दुर्बल असलेल्या विद्यार्थ्यांना शैक्षणिक अनुदान देण्यात आले. भाईंदरमधील अवर लेडी ऑफ नाझरेथ स्कूल, सुबोध विद्यालय, रुबिना अकादमी स्कूल, जे. एच. पोद्दार हायस्कूल, निर्मला निकेतन आदी शाळांमधील १०० विद्यार्थ्यांना आमदार नरेंद्र मेहता यांच्या हस्ते शैक्षणिक अनुदान म्हणून अडीच हजारांचे धनादेश देण्यात आले. याव्यतिरिक्त उत्तन, भाईंदर आणि नवघर या पोलिस ठाण्यांतील कर्मचाऱ्यांना रेनकोटचे वाटप करण्यात आले. विद्यार्थी देशाचे भविष्य आहेत. त्यांच्या शिक्षणात कोणताही अडथळा येऊ नये, यासाठी परोपकार संस्थेने दिलेले शैक्षणिक अनुदान कौतुकास पात्र आहे, असे गौरवोद्‍गार आमदार मेहता यांनी काढले. परोपकार संस्था शिक्षण, वैद्यकीय सेवा, मुलींचे लग्न, गोसेवा, अन्न जल आदी क्षेत्रात कार्य करत आहे, अशी माहिती संघटनेचे समन्वयक ओमप्रकाश गडोडिया यांनी दिली.