माहीम सहकारी संस्थेला राज्यपालांच्या हस्ते पुरस्कार
पालघर, ता. ८ (बातमीदार) ः आंतरराष्ट्रीय सहकार वर्ष व केंद्रीय सहकार मंत्रालयाच्या स्थापनादिनानिमित्ताने माहीम सहकारी संस्थेला राज्य सरकारकडून पुरस्कार घोषित झाला आहे. हा पुरस्कार सोमवारी (ता. ७) राज्यपाल सी. पी. राधाकृष्णन यांच्या हस्ते स्मृतिचिन्ह देऊन संस्थेस गौरविले आहे.
याप्रसंगी सहकारमंत्री बाबासाहेब पाटील, सहकार राज्यमंत्री पंकज भोयर, मुंबईचे पालकमंत्री मंगलप्रभात लोंढा तसेच सहकार क्षेत्रातील उच्च पदस्थ अधिकारी उपस्थित होते. संस्थेच्या वतीने संस्थेचे अध्यक्ष विवेकानंद ठाकूर, उपाध्यक्ष जगदीश राऊत, नीलम राऊत, संस्थेच्या सचिव गंधाली म्हात्रे, उपसचिव ममता चौधरी, तसेच सर्व संचालक मंडळ उपस्थित होते.
स्वातंत्र्याआधी पालघर जिल्ह्यातील पहिली शेतकरी सहकारी संस्था याची स्थापना १९१३ साली झाली. शेतकऱ्यांच्या मालाला चांगली बाजारपेठ मिळावी, तसेच शेतीसाठी उपयुक्त साहित्य पुरविण्यात यावे, या उद्देशाने त्या काळातील तालुक्यातील प्रमुख ठिकाणी माहीम येथे सहकारी संस्थेचे प्रणेते आप्पाजी दांडेकर यांच्या नेतृत्वाखाली ही संस्था स्थापन झाली.
शेतकऱ्यांना कर्जपुरवठा करणे, खते, अवजारांचा पुरवठा व शेतकऱ्यांचा उत्पादित माल खरेदी करून त्याची विक्री करणे, शेतकऱ्याला जास्तीत जास्त फायदा करून देण्याचे काम ही संस्था करते. भाजीपाला लागवडीसाठी या संस्थेमार्फत कर्जपुरवठा होत असतो.
या संस्थेला यापूर्वीही अनेक पुरस्कार लाभले आहेत. अटल पणन संस्था पुरस्कार, नॉर्थ कोकण चेंबर ऑफ कॉमर्सचा उत्कृष्ट कामकाजासाठी पुरस्कार, एनसीडीसीचा उत्कृष्ट कामकाजासाठी पुरस्कार मिळाले आहेत. या शेतकी सोसायटीचे एक हजार दोनशे आठ शेतकरी सभासद असून दरवर्षी पंधरा टक्के शेतकऱ्यांना लाभांश दिला जातो.

फोटो ओळ ः
राज्यपालांच्या हस्ते माहीम सहकारी शेतकी सोसायटीला मिळालेला पुरस्कार स्वीकारताना संस्थेचे पदाधिकारी.