मिनीडोअर रिक्षात तरुणीचा विनयभंग, आरोपीला अटक
रोहा, ता. ८ (बातमीदार) ः आपल्या आईसमवेत मिनीडोअर रिक्षात प्रवास करणाऱ्या तरुणीचा एका ६० वर्षीय व्यक्तीने विनयभंग केल्याची घटना कोलाड येथे घडली. तरुणीचा विनयभंग करणाऱ्या व्यक्तीविरोधात गुन्हा दाखल करून आरोपीला पोलिसांनी अटक केली आहे. कासीम अहमद जलगावकर (रा. निजामपूर, ता. माणगाव) असे आरोपी व्यक्तीचे नाव असून ही घटना रविवारी (ता. ६) दुपारी तीन वाजता मौजे मराठा पॅलेस हॉटेल कोलाडजवळ घडली. मिनीडोअर रिक्षामध्ये रोहा येथे पीडित तरुणी व तिची आई या बारसोली ते कोलाड असा मिनीडोअर रिक्षामधून प्रवास करीत असताना एका व्यक्तीने उजव्या हाताच्या कोपराने फिर्यादी तरुणीच्या डाव्या खांद्याला धक्का मारून तिचा विनयभंग केला. यादरम्यान पीडित तरुणीने आरोपीकडे पाहिले असता आरोपीने फिर्यादी यांना डोळ्याने अश्लील इशारे केल्याने फिर्यादी याच्या मनात लज्जा उत्पन्न केली. या घटनेनंतर तरुणीने कोलाड पोलिस ठाण्यात तक्रार दाखल केली असून आरोपीला अटक करण्यात आली आहे. सहाय्यक पोलिस निरीक्षक नितीन मोहिते यांच्या मार्गदर्शनाखाली अधिक तपास पोलिस उपनिरीक्षक चौधरी करीत आहेत.