खारघर, ता. ९ (बातमीदार) : लोकसंख्येबरोबरच शहरातील वाहनांची संख्या वाढली आहे. त्यात ठिकठिकाणी पडलेल्‍या खड्ड्यांमुळे खारघरमध्ये वाहतूक कोंडी नित्‍याची झाली आहे. ही कोंडी सोडवण्यासाठी उपाययोजना करण्याऐवजी रस्त्यावर वाहतूक नियम मोडणाऱ्यांवर दंडात्मक कारवाईवर भर दिला जात असल्‍याने रहिवाशांमधून नाराजी व्यक्‍त होत आहे.
खारघर परिसरातील वाहतूक कोंडी सोडविण्यासाठी नवी मुंबई वाहतूक विभागाने १५ वर्षांपूर्वी खारघर मधील हिरानंदानी पुलाखाली वाहतूक कार्यालय सुरू केले. प्रामुख्याने नवरंग सर्कलकडून गोखले शाळामार्गे शिल्प चौककडे जाणाऱ्या रस्त्यावर सम-विषम पार्किंग सुरू केली. यामुळे कोंडीत आणखीनच भर पडली असून, बेस्ट आणि एनएमएमटी प्रशासनाला बस बंद कराव्या लागल्या. सेक्टर-१३ मध्ये रस्त्याचा दोन्ही बाजूला विविध दुकाने आणि शॉपिंग कॉम्प्लेक्स असल्‍याने या ठिकाणी येणारे ग्राहक रस्‍त्‍यालगत वाहने उभी करतात. त्यामुळे वर्दळीसाठी रस्ता अरुंद उरतो.
वाहतूक पोलिसांकडून हिरानंदानी, उत्सव चौक, सेंट्रल पार्क, डेली बाजार चौक आदी भागात वाहतुकीचे नियम मोडणाऱ्या वाहनचालकांवर दंडात्मक कारवाई केली जात आहे, मात्र कोंडी सोडवण्यासाठी आवश्‍यक उपाययोजना होत नसल्‍याने चालकांमधून नाराजी व्यक्‍त होत आहे.
सिडकोने खारघर सेक्टर-१२, १३, २० आणि २१ कडे जाणाऱ्या रस्त्याच्या मध्यभागी शिल्प चौक उभारले आहे. सेक्टर-१२ कडे जाणाऱ्या रस्त्याचा कडेला द पॅसिपिक कमर्शियल इमारत आहे. इमारतीच्या तळमजल्यावर खाद्यपदार्थ, मोबाईलची दुकाने, रुग्णालय तसेच काही कार्यालये आहेत. दुसरीकडे बँका आणि विविध एटीएम केंद्र, टूर्सच्या गाड्या, बस आणि रिक्षा थांबा आहे. त्यात दुकानातील व्यापारी, खरेदीसाठी येणारे ग्राहकही रस्‍त्‍यालगत वाहने उभी करीत असल्‍याने सकाळ-संध्याकाळी कोंडीत भर पडते. त्यामुळे शिल्प चौक वाहतूक कोंडीच्या विळख्यात सापडला आहे.
उत्सव चौकच्या बाजूला असलेल्या पॅसिफिक इमारतीत दवाखाने, सभागृह तसेच काही मोठी शोरूम आहेत. उत्सव चौकातून सेक्टर-१२ कडे जाणारा रस्ता अरुंद असून, दुतर्फा वाहने उभी राहात असल्‍याने कोंडी होते. या ठिकाणी कारवाईकडे वाहतूक विभागाकडून दुर्लक्ष होत आहे.
- सूरज पाटील, अध्यक्ष, मनसे खारघर.
खारघर वसाहतीत होणाऱ्या वाहतूक कोंडीविरोधात नियमितपणे कारवाई केली जात आहे. ज्या रस्त्यावर वाहतूक कोंडी आहे. त्या रस्त्यावर वाहतूक पोलिस पथकांमार्फत कारवाई केली जाईल.
- तिरुपती काकडे, उपायुक्त, वाहतूक विभाग, नवी मुंबई
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.