एमआरआय-सीटी स्कॅनसाठी खासगी भागीदारीत निविदा
पाच ठिकाणी केंद्र उभारणार
सकाळ वृत्तसेवा
मुंबई, ता. ९ : मुंबई महापालिकेच्या प्रमुख केईएम, नायर, सायन व कूपर रुग्णालयात नवीन एमआरआय व सीटी स्कॅन मशीन खरेदीचा प्रस्ताव गेल्या अनेक वर्षांपासून प्रलंबित आहे. याविषयी पावसाळी अधिवेशनात प्रश्न उपस्थित करण्यात आला आहे. या प्रश्नाला उत्तर देताना उपमुख्यमंत्री एकनाश शिंदे यांनी स्पष्ट केले की, एमआरआय-सीटी स्कॅनसाठी खासगी भागीदारीत निविदा प्रक्रिया काढली जाईल. निविदा राबवण्याची कार्यवाही चालू असल्‍याची माहितीही त्‍यांनी दिली. यासंदर्भात ‘सकाळ’च्या ३० एप्रिलच्या अंकामध्ये वृत्त प्रकाशित करण्यात आले होते.
अतिरिक्त पाच ठिकाणी खासगी भागीदारांमार्फत एमआरआय व सीटी स्कॅनसाठी पाच ठिकाणी केंद्रांच्या उभारणीसाठी निविदा राबवण्याची कार्यवाही सुरू आहे. २०१८ पासून नायर रुग्णालयातील एमआरआय मशीन बंद आहे. लाखो रुपये खर्च करून हेलियम गॅस भरला गेला, मात्र मोजून २० ते २५ एमआरआय त्यादरम्यान केले गेले. आता जवळपास वर्षभर एमआरआय मशीन पूर्णपणे बंद आहेत.
रुग्णांना सायन, केईएम व उपनगरीय रुग्णालयांमधील खासगी प्रकल्पातील एमआरआय केंद्रांमध्ये पालिकेच्या दराने सेवा उपलब्ध करून दिली आहे, असेही स्पष्टीकरण देण्यात आले आहे.

केईएममध्ये वर्षभराची तारीख
मुंबई महापालिकेच्या केईएम रुग्णालयात देशभरातून विविध आजारांचे असंख्य रुग्ण उपचारांसाठी येतात. शताब्दी वर्ष साजरे करणाऱ्या केईएमला आजही अनेक समस्यांचा सामना करावा लागत आहे. शताब्दी महोत्सवात केईएम रुग्णालय प्रशासनाकडून कोट्यवधी रुपयांचा खर्च केला गेला, पण रुग्णाला एमआरआय करायचा असल्यास एका वर्षाच्या प्रतीक्षा यादीत थांबावे लागत आहे. सूत्रांनी दिलेल्या माहितीनुसार, सद्यःस्थितीत डिसेंबर महिन्याची तारीख दिली असून, पुढचे कॅलेंडर नसल्याने अनेक रुग्णांना एमआरआयच्या तारखेसाठी नाकारले जात आहे. रुग्णालयात १ एमआरआय आणि २ सीटी स्कॅन मशीन कार्यरत असून, त्यांचीही अवस्था बिकट आहे. रुग्णालय प्रशासनाने दिलेल्या माहितीनुसार, अपघात विभाग व अतिदक्षता विभागातील रुग्णांना प्राधान्याने सेवा दिली जात आहे, तर तातडीचे नसलेल्या एमआरआय तपासणीला पुढची तारीख दिली जात आहे.

निविदेला प्रतिसाद नाही
पालिकेच्या चार प्रमुख रुग्णालयांतील अतिरिक्त चार एमआरआय मशीनची खरेदी निविदा २५ एप्रिल रोजी प्रसिद्ध करण्यात आली. या निविदेत फक्त एकाच कंपनीकडून स्वारस्य प्राप्त झाले होते. त्यामुळे पुनर्निविदा प्रक्रिया राबवण्यात आली आहे. आता या निविदा प्रक्रियेला किती कंपनीकडृन स्वारस्य मिळते, हे पाहावे लागेल.