वीजबिल वेळेत भरा, अन्यथा...
महावितरणचे ग्राहकांना आवाहनः वीजजोडणी खंडित होण्याची शक्यता
मुलुंड, ता. ९ (बातमीदार) ः आधुनिक तंत्रज्ञानामुळे घराघरांत विविध वीज आधारित उपकरणांचा वापर वाढला आहे. यासोबतच वाढत्या तापमानामुळे वीज वापरामध्येही लक्षणीय वाढ झाली आहे, याचा थेट परिणाम वीजबिलांवर होत आहे.
महावितरणच्या माहितीनुसार, जून-२०२५ मध्ये घरगुती, व्यावसायिक व औद्योगिक ग्राहकांना चालू वीजदेयके तसेच मागील प्रलंबित थकबाकी अशी एकूण ६२.७८ कोटी इतकी मागणी नोंदवण्यात आली होती. यापैकी ५८.९० कोटी वसूल झाले असून, उर्वरित ३.८८ कोटी रक्कम अजून थकीत आहे. महावितरणने ग्राहकांना आवाहन केले की, त्यांनी अंतिम मुदतीपूर्वी आपले वीजबिल भरावे. अन्यथा नाइलाजास्तव वीजपुरवठा खंडित होऊ शकतो, असा इशाराही त्यांनी या वेळी दिला.
धक्कादायक बाब म्हणजे, मुलुंड विभागात एकूण थकबाकी रक्कम ३.८८ कोटींवर पोहोचली आहे. ही रक्कम मागील आणि चालू बिलांच्या थकबाकीचा समावेश करून आहे. वेळेवर वीजबिल न भरल्यामुळे थकबाकीमध्ये वाढ होत आहे आणि यामुळे महावितरणला कठोर निर्णय घ्यावा लागत आहे.
यासोबतच वीजचोरीच्या प्रकरणांवरही लक्ष ठेवले जात असून, कार्यकारी अभियंता दत्तात्रय पवार यांच्या मार्गदर्शनाखाली विशेष मोहीम राबवण्यात येत आहे. वीजचोरी करणाऱ्यांविरुद्ध कडक कारवाई करण्यात येणार असल्याचे मुलुंड पूर्व महावितरणचे अतिरिक्त कार्यकारी अभियंता दीपक जाधव यांनी स्पष्ट केले आहे. विभागात कुठलेही लोडशेडिंग करण्यात आलेले नाही. विद्युतपुरवठा खंडित होण्याच्या काही घटनांमागे रस्त्याच्या खोदकामामुळे भूमिगत केबल्सचे नुकसान झाल्याची कारणे असून, त्या समस्या त्वरित दूर करण्यात आल्या आहेत, असेही त्यांनी सांगितले.
विशेष म्हणजे ३१ जूनअखेर विभागातील एकूण थकबाकी ३.८८ कोटीपर्यंत पोहोचली असून, थकबाकी वीजबिलांची वसुली करण्यासाठी वीजजोडणी खंडित करण्याची कारवाई केली जाईल. तसेच वीजचोरी करणाऱ्यांविरुद्ध कठोर पावले उचलण्यात येतील, असेही जाधव यांनी सांगितले आहे.