शाळा दुरुस्तीसाठी आठ कोटींचा निधी
धामोळे, बेलपाडा जिल्‍हा परिषदेच्या शाळांची कामे अंतिम टप्प्यात

पनवेल, ता. ९ (बातमीदार) ः महापालिका कार्यक्षेत्रातील जिल्हा परिषदेच्या ३१ शाळांच्या दुरुस्तीचे काम हाती घेण्यात आले आहे. अतिरिक्त आयुक्त गणेश शेटे यांनी, धामोळे व बेलपाडा येथील शाळांची पाहणी करून कामाचा आढावा घेतला. पनवेल महापालिकेच्या कार्यक्षेत्रातील २९ गावांमधील रायगड जिल्हा परिषदेच्या ५१ शाळांचे हस्तांतर रखडले असले तरी महापालिकेने पुढाकार घेत ३१ शाळांची दुरुस्तीची कामे सुरू केली आहेत. यासाठी सुमारे आठ कोटी रुपयांचा निधी मंजूर करण्यात आला आहे.
धामोळे येथील शाळेमध्ये पहिली ते सातवीपर्यंत वर्ग भरले जात आहेत. धामोळे येथील शाळेचे दुरुस्तीचे काम जवळपास पूर्ण झाले आहे. या ठिकाणी एक मजली शाळेची दुरुस्ती करण्यात आली असून यामध्ये फरशी बदलणे, फॉल सीलिंग करणे, दरवाजे- खिडक्या नव्याने बसविणे, अशी विविध कामे करण्यात आली आहे. तसेच पंखे, दिवे लावून शाळेचे रंगकामही करण्यात आले आहे.
बेलपाडा येथे पहिली ते चौथीपर्यंतचे वर्ग भरले जात असून तळमजल्यावर शाळा भरते. या ठिकाणी फरशी बदलणे, प्लास्टर करणे, फॉल सीलिंग करणे, जाळी बसविण्याची कामे करण्यात आली आहेत. दरवाजे- खिडक्या नव्याने बसविण्यात आल्या आहेत. याबरोबरच पंखे, दिवे बसवून शाळेचे रंगकाम करण्यात आले आहे. या वेळी सेवानिवृत्त अधिकारी विनायक जाने, कनिष्ठ अभियंता कोमल जाधव, स्नेहल लांब, प्रभाग अधिकारी जितेंद्र मढवी उपस्थित होते.

मोडकळीस आलेल्या ३१ शाळांच्या दुरुस्तीचे काम महापालिकेने सुरू केले आहे. धामोळे व बेलपाडा येथील कामाची पाहणी करून कामाचा आढावा घेण्यात आला. उर्वरित शाळांच्या दुरुस्तीचे काम लवकरात लवकर पूर्ण करण्याचे निर्देश अधिकाऱ्यांना देण्यात आले आहेत.
- गणेश शेटे, अतिरिक्त आयुक्त, पनवेल महापालिका