शिवसेनेकडून पीडित कुटुबांला दहा लाख रुपयांची मदत
नवी मुंबई , ता. ९ ः सावकारी जाचाला कंटाळून आत्महत्या करणाऱ्या कोपरखैरणे येथील स्व. रवींद्र शिंदे यांच्या परिवाराला शिंदे सेनेच्या वतीने १० लाख रुपयांची मदत करण्यात आली आहे. या मदतीमुळे संबंधित पीडित कुटुंबाला मोठा दिलासा मिळाला आहे. कोपरखैरणे सेक्टर १९ येथे राहणारे ३९ वर्षीय रवींद्र शिंदे यांनी प्रथमेश चव्हाणनामक व्यक्तीकडून २५ हजार रुपये व्याजावर कर्ज घेतले होते; मात्र व्याज आणि चक्रवाढ व्याजाची रक्‍कम रवींद्र यांना भरता आली नाही. त्यामुळे समोरून सतत पैशांसाठी तगादा लावला जात होता. या त्रासाला वैतागून रवींद्र यांनी गळफास घेऊन आत्‍महत्या केली होती. या आत्महत्येची बातमी कळताच शिवसेनेचे बेलापूर विधानसभा क्षेत्राचे जिल्हाप्रमुख किशोर पाटकर यांनी परिवाराचा शोध घेतला आणि त्‍यांच्या कुटुंबाला दहा लाख रुपयांची मदत केली. फक्त २५ हजार रुपयांसाठी एका परिवारातील सदस्याला आत्महत्या करावी लागते, ही बाब फार निंदनीय असल्याचे किशोर पाटकर यांनी सांगितले. अशा प्रकारास कारणीभूत असणाऱ्या घटकांना कडक शासन होणे गरजेचे असल्याचे पाटकर यांनी सांगितले. याप्रसंगी त्यांच्यासोबत महिला शिवसेना जिल्हाप्रमुख शीतल कचरे, ऋषी शिवराम पाटील आदी उपस्थित होते.