मुंब्रा अपघाताचा
अहवाल गुलदस्त्यात

सकाळ वृत्तसेवा
मुंबई, ता. ९ : मुंब्रा रेल्वेस्थानकाच्या हद्दीत घडलेल्या भीषण अपघाताला बुधवारी (ता. ९) एक महिना पूर्ण झाला, तरीही या दुर्घटनेचं नेमके कारण अद्याप स्पष्ट झालेले नाही. पाच प्रवाशांचा मृत्यू आणि आठ जण गंभीर जखमी झालेल्या या घटनेची चौकशी अद्याप अपूर्ण असून, रेल्वे प्रशासनाकडून समितीचा अंतिम अहवालही प्रसिद्ध करण्यात आलेला नाही.

९ जून रोजी सकाळी साडेनऊच्या सुमारास कसारा-सीएसएमटी लोकल आणि सीएसएमटी-कर्जत लोकल एकमेकांच्या दिशेने जात असताना मुंब्रा स्थानक परिसरात ही दुर्घटना घडली. दुर्घटनेच्या दिवशीच मुंबई लोहमार्ग पोलिसांनीही सहाय्यक पोलिस आयुक्तांच्या नेतृत्वाखाली विशेष तपास पथकाची स्थापना केली होती. त्यांच्याकडूनही चौकशीचा कुठलाही प्राथमिक अहवाल सादर करण्यात आलेला नाही. या संपूर्ण प्रकरणामुळे रेल्वे प्रशासनाच्या अपारदर्शकतेबाबत प्रश्नचिन्ह निर्माण झाले आहे. अपघाताचे कारण, जबाबदार यंत्रणा आणि भविष्यातील उपाययोजना यासंबंधी अद्याप काहीच स्पष्टता नसल्याने प्रवासी संघटनांत तीव्र नाराजी व्यक्त होत आहे.