मुरबाड, ता. १० (बातमीदार)ः गुरांच्या बाजारासाठी प्रसिद्ध असलेल्या म्हसा ग्रामपंचायतीच्या नऊपैकी सात सदस्यांनी पदांचे राजीनामे दिले आहेत. त्यामध्ये उपसरपंच दिनेश दाजी कुरले यांचा समावेश असून, विद्यमान संरपंचांविरोधात नाराजी नाट्यावरून विविध तर्कवितर्क काढले जात आहेत.
म्हसा ग्रामपंचायतच्या मासिक सभेत सात सदस्यांनी ३१ मे २०२५ रोजी झालेल्या राजीनामे दिले आहेत, मात्र या सभेत तसेच त्यानंतर २७ जून रोजी झालेल्या सभेत सदस्यांच्या राजीनाम्यावर सरपंच यांनी कोणताही निर्णय घेतला नाही. त्यामुळे मुरबाड पंचायत समितीच्या गटविकास अधिकाऱ्यांकडे हे प्रकरण पाठवले आहे. या कार्यालयाने ठाणे जिल्हा परिषदेच्या मुख्य कार्यकारी अधिकाऱ्यांकडे पाठविले आहे. सदस्यांच्या राजीनाम्याबाबत कोणती भूमिका घ्यायची याबाबत प्रशासनातले अधिकारी संभ्रमात असून, ग्रामपंचायत विस्तार अधिकारी लक्ष्मण सुरोशे यांनी जिल्हा परिषद ठाणे यांच्याकडे हे प्रकरण पाठवले आहे. याबाबत सरपंच जया घागस यांच्याबरोबर दूरध्वनीवरून संपर्क साधला असता त्यांनी फोन उचलला नाही.
------------------------------
राजीनामे मंजूर कोण करणार?
- म्हसा ग्रामपंचायतीमध्ये नऊ सदस्य आहेत. विद्यमान सरपंच जया घागस यांनी पदाचा राजीनामा द्यावा, यासाठी सात सदस्यांनी पदाचे राजीनामे दिले आहेत, पण म्हसा ग्रामपंचायतीच्या सरपंच जया प्रवीण घागस यांच्यासह सदस्य आमदार किसन कथोरे समर्थक असल्याचे सांगितले जाते.
- मुरबाड तालुक्यात प्रथमच एवढ्या मोठ्या संख्येने सदस्यांनी पदाचे राजीनामे दिले आहेत. हे राजीनामे मंजूर करण्याचा अधिकार सरपंचांना आहे, परंतु विद्यमान सरपंचांनी दोन सभांमध्ये कुठलाही निर्णय घेतला नसल्याने सदस्यांचे राजीनामे कोण मंजूर करणार, असा प्रश्न निर्माण झाला आहे.