टोकावडे (बातमीदार)ः महात्मा गांधी विद्यालय व कनिष्ठ महाविद्यालय, धसई येथे गुरुपौर्णिमेचा कार्यक्रम भक्तिभावाने आणि उत्साहात साजरा करण्यात आला. या कार्यक्रमाला शिक्षक व विद्यार्थ्यांनी मोठ्या संख्येने उपस्थित राहून उत्स्फूर्त सहभाग नोंदवला. कार्यक्रमात प्राचार्य प्रमोद घोलप यांनी गुरुपौर्णिमेचे महत्त्व विशद केले. गुरू म्हणजे अज्ञानातून ज्ञानाकडे नेणारा प्रकाशस्तंभ असतो. विद्यार्थ्यांनी जीवनात गुरूचे स्थान सदैव वंदनीय ठेवावे. या वेळी शिक्षक शरद धनराळे यांनी गुरूचे महत्त्व व गुरू-शिष्य परंपरेच्या भूमिकेवर सखोल मार्गदर्शन केले. तसेच शिक्षक अनंत भोंडीवले आणि उमेश सोलशे यांनीही गुरूंच्या मार्गदर्शनाचे महत्त्व अधोरेखित केले. कार्यक्रमाचे सूत्रसंचालन शिक्षक नरेश पडवळ यांनी अत्यंत प्रभावीपणे केले, तर आभार प्रदर्शन विद्यालयाच्या अध्यापकांनी केले. कार्यक्रमाने विद्यार्थ्यांमध्ये गुरूंबद्दल आदर, श्रद्धा आणि प्रेरणा निर्माण केली.