मलनिस्सारण वाहिनीची अखेर दुरुस्ती
टिटवाळा, ता. १० (वार्ताहर) : शहरातील पूर्वेकडील गणेश मंदिराकडे जाणाऱ्या मुख्य रस्त्यावर डीजी -१ तसेच गायत्रीधाम सेक्टर-३ येथील तुंबलेले गटार आणि सांडपाणी याबाबतचे वृत्त ‘सकाळ’ने प्रसिद्ध केल्यानंतर महापालिका प्रशासनाला जाग आली आहे. अनेक दिवसांपासून नागरिकांच्या तक्रारी दुर्लक्षित करणाऱ्या यंत्रणांनी बातमीची दखल घेत धावपळ सुरू केली आहे. बुधवारी (ता. ९) सकाळपासूनच कार्यकारी अभियंता घनश्याम नवांगुळ आणि संबंधित विभागाच्या कर्मचाऱ्यांनी घटनास्थळी हजेरी लावून तातडीने साफसफाई व दुरुस्तीचे काम सुरू केले आहे.

मुख्य गणेश मंदिर रस्त्यावर असलेल्या चेंबरमधून सांडपाणी रस्त्यावर वाहत होते. यामुळे दुचाकीस्वार, पादचारी, लहान मुलांना दररोजचा प्रवास जीव मुठीत धरून करावा लागत होता. पावसाळ्याच्या पार्श्वभूमीवर ही समस्या अधिकच गंभीर बनली होती. याबाबतचे वृत्त ‘सकाळ’ने प्रकाशित करताच प्रशासनाला जाग आली. घटनास्थळी आलेल्या महापालिका अधिकाऱ्यांनी गटार उघडून साचलेले सांडपाणी बाहेर काढण्याचे काम हाती घेतले आहे. मलनिस्सारणमधील अडथळे दूर करण्यासाठी यंत्रसामग्री लावली आहे. त्याचबरोबर वारंवार उघडणाऱ्या चेंबरवर ठेवलेला दगड हटवून नवीन सुरक्षित झाकण बसवण्याचे काम सुरू केले आहे. तसेच नागरिकांच्या तक्रारी ऐकून घेत प्रशासनाने भविष्यात नियमित साफसफाई आणि देखरेख करण्याचे आश्वासन दिले आहे.

...तर नागरिकांचा उद्रेक
संपूर्ण मलनिस्सारण वाहिनीची नियमित देखभाल, वेळोवेळी साफसफाई, चेंबर झाकणांची दुरुस्ती आणि नागरिकांच्या तक्रारींवर तत्काळ प्रतिसाद ही जबाबदारी अजूनही पूर्णत्वास गेलेली नाही, असे मत येथील नागरिक संजय पारेकर यांनी व्यक्त केले. गायत्रीधामसारख्या ठिकाणी वारंवार होणाऱ्या अशा समस्यांवर वेळेवर लक्ष न दिल्यास नागरिकांचा उद्रेक अनिवार्य ठरणार आहे. त्यामुळे प्रशासनाने केवळ या भागापुरतेच नव्हे, तर संपूर्ण टिटवाळा परिसरातील अशा समस्यांवर ठोस उपाययोजना करीत विश्वासार्हता पुन्हा मिळवावी, असे मत विवेकानंद कानेटकर यांनी व्यक्त केले.