श्री मलंगगडावर गुरुपौर्णिमा उत्सव
भाजप प्रदेशाध्यक्ष रवींद्र चव्हाण यांची उपस्थिती
सकाळ वृत्तसेवा
डोंबिवली, ता. १० : कल्याणजवळील श्री मलंगगडावर गुरुपौर्णिमा उत्सवानिमित्त भाविक मोठ्या संख्येने उपस्थित होते. हिंदू मंच ठाणे जिल्ह्याच्या वतीने मलंगगडावर प्रत्येक महिन्याची पौर्णिमा साजरी करण्यात येते. गुरुवारी (ता. १०) भाजपचे नवनिर्वाचित प्रदेश अध्यक्ष रवींद्र चव्हाण यांच्यासमवेत कल्याण जिल्ह्यातील भाजपाच्या पदाधिकाऱ्यांसह साधू, नाथ संप्रदायातील महंतदेखील श्री मलंगगडावर महाआरती सोहळ्यात सहभागी झाले होते. या वेळी भाजपच्या कार्यकर्त्यांनी गडावर मलंगगडमुक्तीच्या घोषणा दिल्या.

कल्याणच्या श्री मलंगगडावर गुरुवारी मोठ्या संख्येने भाविक गुरुपौर्णिमा उत्सवानिमित्त सहभागी झाले होते. श्री मलंगगडावर गुरुपौर्णिमेच्या उत्सवात मुंबईसह ठाणे, रायगड जिल्ह्यातील श्री मलंग भक्त सहभागी होतात. नुकतीच डोंबिवलीकर व संघाचे स्वयंसेवक राहिलेले रवींद्र चव्हाण यांची भाजपच्या प्रदेशाध्यक्षपदी निवड झाली आहे. त्यामुळे भाजपच्या वतीने गुरुपौर्णिमेनिमित्त ‘चलो श्री मलंगगड’चा नारा देण्यात आला होता. भाजपच्या कार्यकर्त्यांनी श्री मलंगगडावर महाआरती करीत ‘आई भवानी शक्ती दे, श्री मलंगगडाला मुक्ती दे’ अशा घोषणा देत गडावरील परिसर दणाणून सोडला.

कल्याण जिल्हा भाजपच्या पदाधिकाऱ्यांसह मोठ्या संख्येने हिंदुत्ववादी संघटनांचे कार्यकर्तेदेखील सहभागी झाले होते. चव्हाण पहिल्यांदा प्रदेशाध्यक्ष म्हणून मलंगगडावर आल्याने त्यांचे विश्व हिंदू परिषद, बजरंग दल, श्री मलंग सेवा समितीसह हिंदू मंचकडून स्वागत करण्यात आले. श्री मलंगगडचे विश्वस्त केतकर कुटुंबाच्या वतीने अभिजित केतकर यांनी प्रदेश अध्यक्ष चव्हाण यांचे स्वागत केले.

भाजपने या वेळी जोरदार बॅनरबाजी केली होती. प्रत्येक गावाच्या वेशीवर चव्हाण यांच्या स्वागताचे होर्डिंग लावले होते. या वेळी भाजप आमदार सुलभा गायकवाड, माजी आमदार नरेंद्र पवार, भाजपा अनुसूचित जाती मोर्चा प्रदेश मंत्री शशिकांत कांबळे, भाजपा कल्याण जिल्हा अध्यक्ष नंदू परब, श्री मलंगगड मंडळ अध्यक्ष समीर भंडारी, माजी नगरसेवक मोरेश्वर भोईर, राजन चौधरी, रविना अमर माळी यांसह भाजपाचे कार्यकर्ते आणि हिंदू मंचचे कार्यकर्ते उपस्थित होते.