तब्बल सहा वर्षांनी ठाणेकर धावणार
- ३१व्या वर्षा मॅरेथॉनचे रविवार १० ऑगस्ट रोजी आयोजन
सकाळ वृत्तसेवा
ठाणे, ता. ११ : ठाणे महापालिका चषक ३१व्या वर्षा मॅरेथॉनचे रविवार, १० ऑगस्ट रोजी आयोजन करण्यात येत असल्याची घोषणा ठाणे महापालिका आयुक्त सौरभ राव यांनी गुरुवारी (ता. १०) केली. ३०वी वर्षा मॅरेथॉन स्पर्धा २०१९ मध्ये झाली होती. आता सहा वर्षांनी पुन्हा देशविदेशातील मॅरेथॉनपटूंसह ठाणेकर नागरिक या मॅरेथॉनमध्ये मोठ्या उत्साहाने सहभागी होऊ शकणार असल्याचे प्रतिपादन आयुक्त सौरभ राव यांनी केले आहे.
सहा वर्षांच्या खंडानंतर ही मॅरेथॉन होत असल्याने सर्व विभागांनी उत्तम समन्वय साधून ही मॅरेथॉन यशस्वी करावी. गेल्या सहा वर्षांत शहराच्या रचनेत, पायाभूत सुविधांमध्ये बदल झाला आहे. हे लक्षात घेऊन सर्व मॅरेथॉन मार्गांचे नियोजन करावे, असे आयुक्त राव यांनी नमूद केले.
मॅरेथॉनकरिता नोंदणी पुढील आठवड्यापासून सुरू होणार असून, विविध गटांच्या मार्गिका आणि सविस्तर कार्यक्रम टप्प्याटप्य्याने जाहीर करण्यात येईल, असेही उपायुक्त पालांडे यांनी स्पष्ट केले. या वेळी उपायुक्त (क्रीडा) मीनल पालांडे यांनी २०१९ची मॅरेथॉन स्पर्धेचा आढावा आणि २०२५ची प्रस्तावित स्पर्धेची रुपरेखा या बैठकीत मांडली.
या मॅरेथॉनचे आयोजन ठाणे महापालिका आणि ठाणे जिल्हा ॲथलेटिक्स असोसिएशन यांच्या संयुक्त विद्यमाने होते.

यंदा २५,००० धावपटू अपेक्षित
सन २०१९ मधील मॅरेथॉनमध्ये एकूण २३,००० खेळाडू सहभागी झाले होते. त्यात सैनिक शाळा, ठामपा शाळा, खासगी शाळा यांचे विद्यार्थीही सहभागी झाले होते. याही वर्षी सुमारे २५,००० खेळाडू मॅरेथॉनमध्ये सहभागी होणे अपेक्षित असल्याची माहिती उपायुक्त पालांडे यांनी दिली.