ट्रेलरच्या धडकेत पादचाऱ्याचा मृत्यू
नवी मुंबई, ता. ११ (वार्ताहर) : ठाणे-बेलापूर मार्गावर तुर्भे येथे रस्ता ओलांडणाऱ्या पादचाऱ्याला भरधाव ट्रेलरने धडक दिल्याने सदर पादचाऱ्याचा मृत्यू झाल्याची घटना गुरुवारी (ता. १०) दुपारी घडली. तुर्भे एमआयडीसी पोलिसांनी या प्रकरणातील ट्रेलरचालक सुरेश लबडे याच्या विरोधात गुन्हा दाखल करून त्याला ताब्यात घेतले आहे. या अपघातातील मृत व्यक्तीची अद्याप ओळख पटली नसल्याची माहिती पोलिसांनी दिली. या अपघातातील मृत व्यक्ती अंदाजे ५५ ते ६० वयोगटातील असून, गुरुवारी दुपारी सव्वाबारा वाजण्याच्या सुमारास तो ठाणे-बेलापूर मार्गावरील सविता केमिकल्स कंपनीजवळून रस्ता ओलांडून जात होता. याचवेळी खैरणे एमआयडीसीकडे जाणाऱ्या वळणावर ट्रेलरने सदर पादचाऱ्याला धडक दिल्याने सदर पादचारी ट्रेलरच्या चाकाखाली येऊन जागीच ठार झाला.