पलावा पूल सुस्थितीत
आमदार राजेश मोरे यांचा दावा
कल्याण, ता. १२ (वार्ताहर) : पलावा पूल सुस्थितीत असून या पुलावरील वाहतूक सुरळीत सुरू असल्याचा दावा आमदार राजेश मोरे यांनी केला आहे. आमदार राजेश मोरे यांनी शुक्रवारी (ता. ११) पुलाची पाहणी करीत विरोधकांच्या टीकेला उत्तर दिले. या वेळी त्यांनी म्हटले, की विकास हा आमचा खरा अजेंडा आहे. नागरिकांच्या सुविधा आणि प्रश्न सोडवणे हेच आमचे प्राधान्य असल्याचे त्यांनी म्हटले.

कल्याण-शिळ रस्त्यावरील पलावा पुलाची पाहणी करीत शिवसेना आमदार राजेश मोरे यांनी ठाकरे गट, मनसेसह विरोधकांवर टीका केली. लोकांच्या सोयीसाठी पूल सुरू केला. टीका करणाऱ्यांना टीका करू द्या, आम्ही विकासाच्या माध्यमातून उत्तर देणार आहोत. वाहतूक सुरळीत झाली पाहिजे, यासाठी पुलाची पाहणी केली आहे. या पाहणीदरम्यान पुलावर स्टोन क्रशर टाकले होते, त्यात पाऊस पडल्याने खड्डे पडल्यासारखे दिसत होते; मात्र प्रत्यक्षात खड्डे पडलेच नव्हते. टीकाकारांचे काम टीका करण्याचे आहे. आमचे काम विकासकामे करण्याचे आहे. टीका करणाऱ्यांना टीका करू द्या, आम्ही विकासाच्या माध्यमातून उत्तर देणार असल्याचे सांगितले.

पुलावर खड्डे नाहीत, तसेच अपघात झाल्याची कोणत्याही पोलिस ठाण्यात नोंद नाही. विरोधकांनी खोटेनाटे पसरवले होते, त्यामुळे टीकाकारांकडे आम्ही लक्ष देत नाही. पुलाचे उद्घाटन झाले नाही, आम्ही लोकांच्या सेवेसाठी पूल खुला केल्याचे राजेश मोरे यांनी सांगितले.