पलावा पुलावरून वादंग
दीपेश म्हात्रे यांचा शिंदे गटाचे आमदार राजेश मोरे यांना टोला
सकाळ वृत्तसेवा
डोंबिवली, ता. १२ : कल्याण-शिळ रस्त्यावरील नवीन पलावा पूल कामाच्या दर्जावरून सतत आरोप-प्रत्यारोप होत आहेत. कल्याण ग्रामीणचे आमदार राजेश मोरे सतत पुलाच्या कामाची पाहणी करण्यासाठी जात आहेत. यावरून आता आमदारांनी तिकडेच घर घ्यावे म्हणजे त्यांना लगेच जाता येईल, असे म्हणत ठाकरे गटाचे जिल्हाप्रमुख दीपेश म्हात्रे यांनी टीका केली आहे.

कल्याण-शिळ रस्त्यावरील नवीन पलावा पुलाचे उद्घाटन झाले, तोच तासाभरात हा पूल बंद केला. पुलावरील रस्त्याचे काम पूर्ण झाले नसल्याने दुचाकीस्वार घसरून काही अपघात झाले. पावसाने तर पुलावरील रस्त्याची दुरवस्थाच करून टाकली. यावरून विरोधकांनी म्हणजेच मनसेचे नेते तथा माजी आमदार राजू पाटील व शिवसेना ठाकरे गटाचे जिल्हाप्रमुख दीपेश म्हात्रे यांनी सत्ताधारी पक्षावर पुलाच्या कामावरून चांगलीच झोड उठवली आहे. यावर सत्ताधारी पक्षाचे आमदार मोरे यांनी विरोधकांना बोलायचे ते बोलू द्या, आमचे काम बोलेल, असे उत्तर दिले होते.

पुलाच्या रस्त्याचे काम पुन्हा केले असून कल्याण ग्रामीणचे आमदार राजेश मोरे यांनी पुलाची पाहणी केली. यावरून शिवसेना ठाकरे गटाचे जिल्हाप्रमुख म्हात्रे यांनी टीका करताना म्हटले, की ते सतत पलावा पुलावर जात आहेत. आता त्यांनी तिकडेच घर घ्यावे, म्हणजे सकाळी उठले की त्यांना लगेच तिकडे जाता येईल, फार त्रास होणार नाही. पुलाच्या निकृष्ट दर्जाच्या कामाची माहिती आता केवळ राष्ट्रीय नाही तर आंतरराष्ट्रीय स्तरावर पोहोचली आहे. अनेक वृत्तपत्र आणि न्यूज चॅनेलनी याची दखल घेत सरकार आणि यंत्रणांवर ताशेरे ओढले आहेत. यासंदर्भात आम्ही कल्याण पोलिस उपायुक्त अतुल झेंडे यांची भेट घेऊन संबंधित ठेकेदारावर गुन्हा दाखल करण्यासाठी चौकशीची मागणी केली असून लवकरच त्या ठेकेदारावर कायदेशीर कारवाई होईल, असा विश्वास त्यांनी व्यक्त केला.