उपकेंद्राच्या नामांतरासाठी युवासेनेचे आंदोलन
कल्याण, ता. १२ (बातमीदार) : मुंबई विद्यापीठाच्या व्यवस्थापन परिषदेत मंजुरी मिळूनही कल्याण येथील उपकेंद्राला आनंद दिघे यांचे नाव देण्यात आलेले नाही. या उपकेंद्राला आनंद दिघे यांचे नाव न दिल्यास आम्हीच नामकरण सोहळा करू, असा इशारा ठाकरे गटाच्या युवासेनेने दिला होता. या अनुषंगाने युवासेनेने कल्याण उपकेंद्राच्या भिंतीवर ‘धर्मवीर आनंद दिघे - मुंबई विद्यापीठ कल्याण उपकेंद्र’ असा नामफलकच झळकावला. याप्रसंगी ‘धर्मवीर आनंद दिघे साहेबांचा विजय असो’ या घोषणा देत अधिसभा सदस्यांनी परिसर दणाणून सोडला होता. ठाणे जिल्ह्यातील कल्याण उपकेंद्राला आनंद दिघे यांचे नाव देण्यास दिरंगाई होत आहे. त्यामुळे या नामकरणासाठी शिवसेना ठाकरे गटाने मुंबई विद्यापीठाकडे आग्रह धरला आहे; मात्र मुंबई विद्यापीठाने दुर्लक्ष केल्याने युवासेनेने कल्याण उपकेंद्राच्या भिंतीवर नामफलक झळकावला.