अलिबाग, ता. १२ (वार्ताहर) ः भातलागवड म्हणजे कोकणसह रायगड जिल्ह्यातील शेतकऱ्यांसाठी एक वेगळाच उत्सव असतो. त्यामुळेच रायगड जिल्हा परिषदेचे अतिरिक्त मुख्य कार्यकारी अधिकारी सत्यजित बडे यांनी एक स्तुत्य उपक्रम हाती घेतला आहे. शेतकऱ्यांना प्रोत्साहन मिळावे, यासाठी ‘एक दिवस शेतकऱ्यांसाठी’ या संकल्पनेतून कृषी विभागाच्या वतीने मुख्य कार्यकारी अधिकारी नेहा भोसले यांचेसमवेत सर्व खाते प्रमुखांनी शेतकऱ्यांच्या शेतावर जाऊन भातपीक लागवडीचा उत्‍सव साजरा केला.
थळ ग्रामपंचायतीतील भाल येथील शेतकरी कृष्णा दळवी यांच्या शेतावर भातलागवडीचा कार्यक्रम घेण्यात आला. मुख्य कार्यकारी अधिकारी नेहा भोसले यांनी शेतकऱ्यांनी पारंपरिक शेतीसोबतच यांत्रिकीकरणाचा जास्तीत जास्त वापर करावा व सेंद्रिय शेतीवर लक्ष केंद्रित करावे, विषमुक्त अन्न तयार करण्याबाबत शेतकऱ्यांना प्रोत्साहित केले. तसेच शेतकऱ्यांनी आपल्या कृषी उत्पन्नामध्ये वाढ करण्याकरिता रायगड जिल्हा परिषदेच्या कृषी विभागातील विविध कृषी योजनांचा लाभ घेण्याचे आवाहान या कार्यक्रमाच्या निमित्ताने केले.
भातलागवड कार्यक्रमात मुख्य लेखा व वित्त अधिकारी राहुल कदम, प्रकल्प अधिकारी प्रियदर्शनी मोरे, उपमुख्य कार्यकारी अधिकारी (म.बा.) निर्मला कुचीक, उपमुख्य कार्यकारी अधिकारी (सा.प्र.) जालिंदर पाठारे, कृषी विकास अधिकारी महेश नारायणकर, जिल्हा कृषी अधिकारी निकिता सूर्यवंशी, अलिबाग पंचायत समिती गटविकास अधिकारी शर्मिला पाटील, मुरूडचे गटविकास अधिकारी राजेंद्रकुमार खताळ, कृषी सहाय्यक आदी उपस्थित होते. कार्यक्रमाचे आयोजन पंचायत समिती अलिबाग कृषी अधिकारी राजेश घरत, मुरूडचे विस्तार अधिकारी वसंत दळवी, तसेच थळ ग्रामपंचायत अधिकारी नितेश तेलगे यांच्यामार्फत करण्यात आले होते.