मुरबाड, ता. १२ (बातमीदार) : सरकारच्या भातखरेदी बोनसपासून वंचित असलेल्या मुरबाड तालुक्यातील ५००पैकी ४७६ शेतकऱ्यांच्या बँक खात्यात पैसे जमा झाल्याने शेतकरी आनंदित झाले आहेत. मुरबाड तालुक्यात शेतकरी सहकारी संघामार्फत २०२०-२१ मध्ये भातखरेदी केली. त्यापैकी ५०० शेतकऱ्यांचे भातविक्रीची नोंदणी ३१ मार्चपूर्वी न झाल्याने ते बोनसपासून वंचित राहिले होते. शेतकऱ्यांना बोनस मिळावा, म्हणून सामाजिक कार्यकर्ते रमेश हिंदुराव यांनी डिसेंबरपासून सातत्याने पाठपुरावा केला. सरकारकडे अनेक वेळा पत्रव्यवहार केला. उपोषण केले आणि संबंधित विभागाकडून शेतकऱ्यांना बोनस मिळेल, असे आश्वासन घेतले. याशिवाय, शेतकऱ्यांना न्याय मिळण्यासाठी आमदार संजय केळकर, आमदार किसन कथोरे यांनी विधानसभेत प्रश्न उपस्थित केला होता. माजी आमदार गोटीराम पवार यांनीही सातत्याने शेतकऱ्यांना बोनस मिळावा म्हणून प्रयत्न केले. अखेर या शेतकऱ्यांच्या बँक खात्यात भाताच्या बोनसचे पैसे जमा झाले आहेत, असे हिंदुराव यांनी सांगितले.