भिवंडी, ता. १२ (वार्ताहर) : गाडी पार्किंगच्या वादातून दोन गटांत धुमश्चक्री उडून राडा झाल्याची घटना शांतीनगर परिसरातील पिराणी पाड्यात शुक्रवारी सायंकाळच्या सुमारास घडली. याप्रकरणी शांतीनगर पोलिस ठाण्यात परस्परविरोधी गटातील सहा जणांविरोधात गुन्हा दाखल केला असून एकाला अटक केली आहे.
हिलया अब्दुल खान, मोहम्मद रझमी अब्दुल खान, अब्दुल रशिद खान, रिजवान शब्बीर खान व त्याचे दोन नातेवाईक अशी गुन्हा दाखल झालेल्यांची नावे आहेत. यातील मो. रझमी याला पोलिसांनी अटक केली आहे. पोलिसांनी दिलेल्या माहितीनुसार, शुक्रवारी रिजवान आणि अब्दुल या दोन गटांत गाडी पार्किंगवरून वाद झाला. त्यानंतर या वादाचे पर्यवसन हाणामारीत झाले. लाकडी दांडका, चाकू हल्ला करण्यात आला. यामध्ये रिजवान याचा भाचा आणि अब्दुल हे दोघे गंभीर जखमी झाले आहेत. त्यांना उपचारासाठी रुग्णालयात दाखल केले आहे. याप्रकरणी शांतीनगर पोलिस ठाण्यात दोन्ही गटाने दिलेल्या सहा जणांवर गुन्हा दाखल करून एकाला अटक केली आहे.