अंबरनाथ, ता. १३ (बातमीदार) : अंबरनाथमध्ये तिसरी आणि चौथी मार्गिका टाकण्याचे; तसेच रेल्वे स्थानक नूतनीकरणाची कामे प्रगतिपथावर आहेत. मुंबई रेल्वे विकास कॉर्पोरेशनच्या माध्यमातून वेगाने कामे सुरू आहेत. याच कामांतर्गत जुना पादचारी पूल गैरसोयीचा असल्याने नव्या पुलाची निर्मिती करण्यात आली. पुलाच्या पायऱ्यापासून वरपर्यंत बंदिस्त पूल आहे. अंबरनाथ रेल्वेस्थानक परिसरात पूर्व आणि पश्चिम भागाला जोडणारा हा नवीन प्रशस्त आणि रुंद पादचारी पूल आहे. हा पूल पूर्वीपासून फारसा वापरात नसलेल्या जुन्या स्कायवाॅकला जोडण्यात आला आहे.
१० ते १५ वर्षांपूर्वी रेल्वेस्थानक ते अंबरनाथ नगरपालिका कार्यालयापर्यंत एमएमआरडीएने स्कायवॉक बांधला आहे. रेल्वे पादचारी पुलाला स्कायवाॅक समांतर बांधलेला नाही. पादचारी पुलावरून उतरून स्कायवाॅकवर चढावे लागते. त्यामुळे नागरिक सहसा स्काॅयवाकवरून जाणे टाळतात. नव्याने बांधलेला पादचारी पुलावरूनही स्कायवॉकला जाण्यासाठी पायऱ्या चढणे-उतरणे असा द्राविडी प्राणायाम करावा लागणार आहे. हा पादचारी पूल रेल्वे फलाटाला जोडलेला नाही. तो फक्त पूर्व आणि पश्चिमेला जाण्यासाठी असल्याचा माहिती फलक रेल्वेने पुलावर लावला आहे. रेल्वे फलाटावर जाण्यासाठी मध्यभागी असलेल्या जुन्या पादचारी पुलाचा वापर करावा, असेही रेल्वेतर्फे आवाहन करण्यात आले आहे. त्यातच पुलावरील कामे अद्याप बाकी असूनही नागरिकांची ये-जा सुरू झाली आहे.
प्रवाशांसाठी सरकते जिने
काही वर्षांपूर्वी फलाट एक आणि तीनवर रेल्वे प्रशासनाने सरकता जिना बांधला होता. काही महिन्यांपासून तो वापरासाठी बंद ठेवला आहे. आता नव्या पादचारी पुलाला हा सरकता जिना बसवण्यात येणार आहे. यासाठी तीन नंबर फलाटाच्या बाजूचा सरकता जिना काढून ठेवण्याचे काम सुरू आहे. तथापि, फलाट एक आणि दोनच्या मध्यभागी असलेल्या सरकत्या जिन्याचा प्रवाशांना उपयोग करणे सोयीचे ठरले आहे.
अंबरनाथला स्कायवॉक असला, तरी पायऱ्यांची चढ-उतार करावी लागत असल्याने सहसा त्याचा कुणी वापर करत नाही. या त्रासामुळे वाहनांच्या गर्दीतून वाट काढत जाणे नागरिक पसंत करतात. शिवाय, स्कायवॉकवर उखडलेल्या लाद्या, घाणीचे साम्राज्य असते. आता नवीन पादचारी पूल बांधला; पण त्यालाही नागरिकांना पायऱ्या चढून स्कायवॉकवर जावे लागणार. झालेली चूक सुधारावी आणि नागरिकांना होणारा त्रास दूर करण्याचा रेल्वे प्रशासनाने विचार करावा.
- रत्नाकर चांदस्कर, रहिवासी, सामाजिक कार्यकर्ते, अंबरनाथ
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.