शिष्यवृत्ती परीक्षेत पनवेलची बाजी
५३१ विद्यार्थी पास, ९२ विद्यार्थ्यांना शिष्यवृत्ती
पनवेल, ता. १२ (बातमीदार) : फेब्रुवारी २०२५मध्ये झालेल्या शिष्यवृत्ती परीक्षेमध्ये पनवेलच्या विद्यार्थ्यांनी बाजी मारली. दोन हजार ३७३ पैकी ५३१ विद्यार्थी उत्तीर्ण तर ९२ विद्यार्थ्यांना शिष्यवृत्ती मिळाल्याची माहिती गटशिक्षणाधिकारी सीताराम मोहिते यांनी दिली. शिष्यवृत्ती परीक्षेत मोठ्या प्रमाणात यश मिळाल्याने विद्यार्थी व पालकवर्गामध्ये आनंदाचे वातावरण आहे.
राज्य सरकारद्वारे घेण्यात येणाऱ्या शिष्यवृत्ती परीक्षेत पनवेल विभागाने यंदा उल्लेखनीय कामगिरी केली आहे. एकूण दोन हजार ३७३ विद्यार्थ्यांनी परीक्षा दिली असून, त्यामधून ५३१ विद्यार्थी यशस्वी झाले आहेत. विशेष म्हणजे त्यापैकी तब्बल ९२ विद्यार्थ्यांनी शिष्यवृत्ती पात्रता प्राप्त केली आहे. शिष्यवृत्ती परीक्षा ही ग्रामीण तसेच शहरी भागातील विद्यार्थ्यांच्या शैक्षणिक प्रगतीस चालना देण्यासाठी घेतली जाते. यामध्ये तिसरी व पाचवीच्या विद्यार्थ्यांसाठी वेगवेगळ्या पातळ्यांवर परीक्षा घेण्यात आली होती.
ग्रामीण भागातील शिक्षणाची गुणवत्ता सुधारली
यंदाच्या निकालात पनवेल विभागाने घवघवीत यश मिळवले असून, विद्यार्थ्यांच्या अभ्यासातील सातत्य, शिक्षकांचे मार्गदर्शन आणि पालकांच्या पाठबळाचा मोठा वाटा या यशात आहे. विशेष म्हणजे या शिष्यवृत्तीत ग्रामीण भागातील शाळांमधील विद्यार्थ्यांचाही समावेश असून, यामुळे ग्रामीण भागात शिक्षणाची गुणवत्ता वाढत असल्याचे स्पष्ट होते.

नवी मुंबईतील २३९ विद्यार्थी गुणवत्ता यादीत
वाशी (बातमीदार) : शैक्षणिक वर्षामध्ये यंदा नवी मुंबई महापालिका क्षेत्रातील शाळांमधील पाचवीच्या १२९ आणि आठवीच्या ११० अशा एकूण २३९ विद्यार्थ्यांना यश मिळाले आहे. यामध्ये शाळा क्रमांक ४२, घणसोली येथील स्वराली विठ्ठल जगधने (आठवी) या विद्यार्थिनीने महापालिकेच्या शाळांमधून प्रथम तर ठाणे जिल्ह्यातून तिसरा क्रमांक पटकावला आहे. शुभ्रा भगवान गायकवाड या पाचवीच्या विद्यार्थिनीने शाळांमधून प्रथम क्रमांक प्राप्त केला आहे.