स्मशानभूमीत जादूटोणा करणाऱ्या दोघांना चोप

कर्जत, ता. १२ (बातमीदार) : तालुक्यातील हालिवली गावातील स्मशानभूमीत जादूटोण्याचा प्रकार घडला. ही घटना शुक्रवारी (ता. ११) रात्री दहा वाजण्याच्या सुमारास उघडकीस आला. या घटनेमुळे परिसरात काही काळ खळबळ उडाली. स्थानिकांनी यामधील दोघांना पकडून चोप दिला व पोलिसांच्‍या स्वाधीन केले.

मिळालेल्या माहितीनुसार, हालिवली गावाच्या आदिवासीवाडीच्या स्मशानभूमीत काही जण संशयास्पद हालचाली करीत असल्याचे स्थानिकांच्या लक्षात आले. त्यांनी तत्काळ त्या ठिकाणी धाव घेतली आणि दोघांना पकडून चोप दिला. दरम्यान, त्यांच्यासोबत असलेल्या चार व्यक्ती घटनास्थळावरून पळून गेले. आदिवासी तरुणांच्या सतर्कतेमुळे हा प्रकार उघडकीस आला आहे. पकडण्यात आलेल्या दोघांमध्ये शिंदे नावाचा स्थानिक व्यक्ती असून दुसरा एक जण पाली, सुधागड येथील असल्याचे समजते. पोलिसांनी या घटनेची नोंद घेतली आहे; मात्र या घटनेमुळे समाजात आजही अंधश्रद्धा किती खोलवर रुजलेली आहे, हे पुन्हा एकदा स्पष्ट झाल्याची भावना स्थानिक ग्रामस्थांनी व्यक्त केली. कर्जत पोलिस या प्रकरणाचा अधिक तपास करीत आहेत.