स्वयंपुनर्विकास समिती अहवाल सोमवारी शासनाला देणार

मुंबई, ता. १२ : राज्यातील सहकारी गृहनिर्माण संस्थांच्या स्वयंपुनर्विकासाला चालना देण्यासाठी भाजपचे विधान परिषदेतील गटनेते आणि मुंबई बँकेचे अध्यक्ष प्रवीण दरेकर यांच्या अध्यक्षतेखाली नेमलेल्या समितीचा अहवाल सोमवारी (ता. १४) शासनास दिला जाईल.

या समितीत दरेकर यांच्यासह अकरा तज्ज्ञ होते. या समितीने राज्यातील प्रमुख शहरांचा दौरा करून लोकप्रतिनिधी, सरकारी अधिकारी, सामान्यजन, गृहनिर्माण संस्थांचे पदाधिकारी, बँकांचे अधिकारी यांच्याशी चर्चा करून या सूचनांचा अहवाल तयार केला आहे. स्वयंपुनर्विकासाला सरकार, बँका यांच्या तर्फे कसे प्रोत्साहन देता येईल, यासाठी नियमात काय बदल करावे लागतील, आदी मुद्दे या अहवालात आहेत. विधान भवनातील मुख्यमंत्री समिती कक्षात संध्याकाळी चार वाजता हा अहवाल दिला जाईल. कार्यक्रमाच्या अध्यक्षस्थानी मुख्यमंत्री देवेंद्र फडणवीस असतील. उपमुख्यमंत्री एकनाथ शिंदे, उपमुख्यमंत्री अजित पवार, विधान परिषद सभापती राम शिंदे, विधानसभा अध्यक्ष राहुल नार्वेकर, महसूलमंत्री चंद्रशेखर बावनकुळे, मंत्री मंगलप्रभात लोढा, आशीष शेलार, बाबासाहेब पाटील, गृहनिर्माण राज्यमंत्री पंकज भोयर, भाजप प्रदेशाध्यक्ष रवींद्र चव्हाण या वेळी उपस्थित राहतील, असे प्रवीण दरेकर यांनी सांगितले.