अमली पदार्थविक्री करणाऱ्यावर कारवाई करा
परिवहनमंत्री प्रताप सरनाईक यांचे पोलिसांना आदेश

भाईंदर, ता. १२ (बातमीदार) : मिरा रोडमधील हटकेश परिसरात गेल्या काही दिवसांपासून अमली पदार्थांची विक्री व सर्रास सेवन होत असल्याची बाब उघडकीस आली आहे. यावर पोलिसांकडून कानाडोळा करण्यात येत होता. अखेर परिवहनमंत्री प्रताप सरनाईक यांनी स्वत: या परिसराला भेट देऊन पाहणी करीत अमली पदार्थविक्रीवर कठोर कारवाई करून पोलिसांवरही कारवाई करण्याचे आदेश शनिवारी (ता. १२) दिले.

हटकेश भागातील ‘माफिया’ नावाच्या क्लबजवळ काही दिवसांपूर्वी अमली पदार्थांची तस्करी करणाऱ्या आरोपींना काशीगाव पोलिसांनी अटक केली होती; मात्र केवळ दोन तासांतच या आरोपींना सोडून देण्यात आले. याची माहिती मिळताच प्रताप सरनाईक यांनी शनिवारी या परिसराला भेट दिली. शहरात अशा प्रकारे खुलेआम अमली पदार्थांची विक्री व सेवन होत असेल, तर हे अत्यंत गंभीर प्रकरण आहे. शहराच्या प्रतिमेला कलंक लागणाऱ्या अशा घटनांवर तत्काळ आणि कठोर कारवाई केली पाहिजे, असे सांगत या प्रकरणातील आरोपींवर मोक्काअंतर्गत कारवाई करण्याचे आदेश सरनाईक यांनी पोलिसांना दिले. याप्रकरणी काशिगाव पोलिस ठाण्यातील काही पोलिसांनी अमली पदार्थ माफियांना मदत केल्याची माहिती त्यांनी नवनियुक्त पोलिस आयुक्त नितीन कौशिक यांच्या कानावर घातली. याप्रकरणी तातडीने चौकशी करून अमली पदार्थ माफियांना अटक करावी, तसेच ज्या पोलिसांकडून त्यांना मदत करण्यात आली आहे, त्यांच्यावर तत्काळ कारवाई करावी, अशी सूचना सरनाईक यांनी केली.

...
अमली पदार्थमुक्त शहर मोहीम
मिरा-भाईंदरमध्ये अशा प्रकारांना आळा घालण्यासाठी ‘अमली पदार्थमुक्त शहर मोहीम’ राबविण्यात येईल. शहराच्या विकासाला अडथळा ठरणाऱ्या, तरुण पिढीच्या भविष्याशी खेळणाऱ्या कोणत्याही शक्तींना मिरा-भाईंदरमध्ये थारा नाही. इथे कायद्याचे राज्य आहे आणि ते अबाधित ठेवण्यासाठी शासन कटिबद्ध आहे, अशी प्रतिक्रिया प्रताप सरनाईक यांनी दिली.