डम्परच्या धडकेत पोलिसाचा मृत्यू
सकाळ वृत्तसेवा
ठाणे, ता. १३ : डम्परने दिलेल्या धडकेत ठाणे शहर पोलिस दलातील पोलिस हवालदार सुरेश भालेराव (३७) यांचा जागीच मृत्यू झाल्याची घटना शनिवारी (ता. १२) सकाळी साडेदहाच्या सुमारास कॅडबरी नाक्यावर घडली. याप्रकरणी राजकुमार चौधरी या डम्परचालकाला अटक करण्यात आली आहे. ठाण्यातील शिवाजी नगर येथे वास्तव्यास असलेले सुरेश भालेराव हे दुचाकीवरून कॅडबरी नाका येथून शनिवारी सकाळी नाशिक महामार्गाने जात होते. या वेळी त्यांच्या दुचाकीला डम्परने धडक दिल्याने दुचाकीसह भालेराव हे डम्परखाली आले. यात भालेराव यांचा जागीच मृत्यू झाला आहे. भालेराव हे ठाणे शहर पोलिस मुख्यालयात कार्यरत होते. याप्रकरणी लोकमान्य नगर येथील राजकुमार चौधरी या डम्परचालकाविरोधात गुन्हा दाखल करत त्याला अटक केल्याची माहिती राबोडी पोलिस ठाण्याचे वरिष्ठ पोलिस निरीक्षक हेमंत पाटील यांनी दिली.