घाटकोपर, ता. १३ (बातमीदार)ः परदेशी माल पाठवण्याच्या प्रक्रियेत नफ्याचे प्रलोभन दाखवून सात कोटी ८५ हजारांची फसवणूक करण्यात आली होती. या प्रकरणात चौघांविरोधात पंतनगर पोलिस ठाण्यात गुन्हा दाखल करण्यात आला आहे.
घाटकोपर येथील कस्टम हाउस क्लिअरिंग एजंट राजेश नाखुआ ‘मेक इंडिया इम्पेक्स’ या कंपनीमार्फत खाद्यपदार्थांचे आयात-निर्यात काम करतात. मे २०२३मध्ये लक्ष्मण नागुला यांच्या माध्यमातून त्यांचा संपर्क एलीट ग्रीन कंपनीशी संलग्न इतर दोन कंपन्यांशी करार झाला. या कंपन्या अमेरिका, अफगाणिस्तान, ओमान, सिंगापूर, मोजांबिक, कॅनडा आणि टोगो या देशांमध्ये साखर आणि तांदळाची निर्यात करीत असल्याचा दावा केला होता. मेक इंडिया इम्पेक्स या कंपनीला कस्टम क्लिअरन्सचे काम देण्यात आले. मार्च २०२४मध्ये कंपनीने कंटेनर तसेच बल्क साखरेसाठी कोटेशन पाठवण्यात आले. फेब्रुवारी ते डिसेंबर २०२४ या काळात एकूण २२.९४ कोटींची देयके देण्यात आली. त्यापैकी ७.८५ कोटींची थकबाकीमुळे रघुराम थंडासेरी, सारीगा थंडासेरी, दनेशा थंडासेरी आणि लक्ष्मण नागुलावरती फसवणूकप्रकरणी गुन्हा दाखल आहे. याप्रकरणी कोणालाही अटक झाली नसून, सखोल तपास सुरू असल्याचे परिमंडळ ७चे पोलिस उपायुक्त राकेश ओला यांनी सांगितले.