मोखाडा (बातमीदार) : मोखाडा पोलिस ठाणे हद्दीतील कारेगाव शिवाराच्या बाजूने वैतरणा नदीपात्रात अनोळखी पुरुषाचा मृतदेह आढळून आला आहे. शवविच्छेदन करण्यासाठी मोखाडा पोलिसांनी मृतदेह ग्रामीण रुग्णालयात दाखल केला असून पोलिस ठाण्यात अकस्मात मृत्यूची नोंद केली आहे. मोखाड्यातील मध्य वैतरणा नदीपात्रात गेल्या वर्षी घातपात, तसेच हत्या करून मृतदेह फेकून दिल्याच्या घटना घडल्या आहेत. यावर्षी धरण भरल्यानंतर ३० ते ४० वयोगटातील पुरुषाचा मृतदेह आढळून आला आहे. त्याच्या उजव्या हातात धातूचे कडे असून दोन्ही हातांवर गोंदण आहे. ही व्यक्ती कुणाच्या ओळखीची असल्यास तत्काळ संपर्क करण्याचे आवाहन मोखाडा पोलिसांनी केले आहे. या घटनेचा अधिक तपास पोलिस उपनिरीक्षक प्रतीक पोकळे करीत आहेत.