उल्हासनगर, ता. १३ (वार्ताहर) : उल्हासनगर कॅम्प ४ येथील एका बोगस डॉक्टरकडून तब्बल सहा वर्षे चालवलेल्या बेकायदा वैद्यकीय व्यवसायाचा पर्दाफाश झाला आहे. न्यायालयाच्या आदेशावरून संबंधित बोगस डॉक्टरसह आणखी तीन डॉक्टरांविरोधात गुन्हा दाखल करण्यात आला आहे. कोरोनासारख्या गंभीर काळातही या चौघांनी संगनमत करून नागरिकांची फसवणूक केल्याचा गंभीर आरोप आहे. या प्रकारामुळे वैद्यकीय क्षेत्रात खळबळ उडाली आहे.
उल्हासनगर कॅम्प ४ येथील एसएसटी महाविद्यालयाजवळ ‘श्री साई क्लिनिक’ नावाने सुरू असलेल्या खासगी दवाखान्यात श्रीकृष्ण कुमावत नावाचा व्यक्ती २०१८पासून बिनपरवानी रुग्णांवर उपचार करत असल्याची माहिती समोर आली. या व्यक्तीकडे कोणताही वैद्यकीय परवाना नसताना तो ‘डॉक्टर’ असल्याचा देखावा करत होता. विशेष म्हणजे, त्याने डॉ. चंदर रोहरा, डॉ. अरुण भाकरे आणि डॉ. सुरेश पिलारे यांच्या नावाने रुग्णांवर उपचार करत असल्याचा आरोप आहे. या प्रकाराविरोधात डॉ. राकेश गाजरे यांनी वेळोवेळी कल्याण-डोंबिवली महापालिकेच्या आरोग्य विभागाकडे तक्रारी केल्या होत्या. चौकशीदरम्यान आरोग्य विभागाने श्रीकृष्ण कुमावत फक्त कम्पाउंडर म्हणून कार्यरत असल्याचे म्हटले. मात्र, गाजरे यांनी स्वतःच कुमावत रुग्णांची तपासणी करत असल्याचा व्हिडिओ पुरावा सादर करून बोगस डॉक्टर असल्याचे सिद्ध केले.
आरोग्य विभागाने पूर्वी कुमावतला तपासणी न करण्याचा लेखी इशारा दिला होता; परंतु तरीही त्याने याचे उल्लंघन करत आपल्या क्लिनिकमध्ये रुग्ण तपासणे सुरूच ठेवले होते. या पार्श्वभूमीवर डॉ. गाजरे यांनी न्यायालयात धाव घेतली. न्यायालयाने त्यांच्या युक्तिवादाची दखल घेत विठ्ठलवाडी पोलिसांना श्रीकृष्ण कुमावतसह डॉ. रोहरा, डॉ. भाकरे आणि डॉ. पिलारे यांच्याविरोधात गुन्हा दाखल करण्याचे आदेश दिले. याप्रकरणी विठ्ठलवाडी पोलिसांनी आता गुन्हा दाखल करून तपास सुरू केला आहे.