कामवारी नदीत आढळला बेपत्ता मुलाचा मृतदेह
भिवंडी, ता. १३ (वार्ताहर) : तालुक्यातील शेलार परिसरातील दोन दिवसांपासून बेपत्ता असलेल्या १४ वर्षीय मुलाचा मृतदेह कामवारी नदीत आढळून आला. सूरज तिवारी असे या मुलाचे नाव आहे. पोलिसांनी दिलेल्या माहितीनुसार सूरज हा खासगी शिकवणीसाठी घरातून निघाला होता, मात्र मध्येच तो मित्रांसोबत कामवारी नदीत पोहण्यासाठी गेला होता. पाण्याचा अंदाज न आल्याने नदीपात्रात बुडाला. या वेळी घाबरलेले त्याचे मित्र कोणालाही काही एक न सांगता निघून गेले. त्यानंतर सूरजच्य कुटुंबीयांनी त्याची शोधाशोध सुरू केली होती. त्यानंतर शनिवारी (ता. १२) त्याच्या मित्राने सूरज नदीत पोहण्यासाठी गेल्याचे सांगितले. या घटनेची माहिती मिळताच अग्निशामक दलाने कामवारी नदीपात्रात सूरजचा शोध सुरू केला होता. त्याचा मृतदेह रविवारी (ता. १३) दुपारी नदीपात्रात तरंगताना आढळून आळा. अग्निशामक दलाच्या जवानांनी सूरजचा मृतदेह नदीतून काढून पोलिसांच्या स्वाधीन केला. पोलिसांनी पंचनामा झाल्यानंतर मृतदेह शवविच्छेदनासाठी शासकीय उपजिल्हा रुग्णालयात रवाना केला आहे. या दुर्घटनेनंतर परिसरात शोककळा पसरली आहे.