कांजूरमार्ग येथे
इमारतीत आग
घाटकोपर, ता. १३ (बातमीदार) : कांजूरमार्ग येथील आर. देशमुख मार्गावरील एन.जी. रॉयल पार्क या २० मजली इमारतीच्या १८व्या मजल्यावर आज रविवारी (ता. १३) सकाळी साडेअकराच्या सुमारास आग लागल्याची घटना घडली. ही आग १८ ते २०व्या मजल्यांदरम्यान पसरल्याचे प्राथमिक माहितीतून समजते. आगीचे नेमके कारण अद्याप स्पष्ट झालेले नाही.
अग्निशमन दलाच्या तीन गाड्या तातडीने घटनास्थळी दाखल झाल्या. बहुमजली इमारत असल्याने अतिरिक्त अद्ययावत यंत्रसामग्रीसह दलाने तत्काळ बचावकार्य सुरू केले. आग लागल्यावर ती विद्युत वाहिन्यांपर्यंत पोहोचल्याचे लक्षात येताच इमारतीतील रहिवाशांनी तत्काळ बाहेर पडत आपला जीव वाचवला. आगीमुळे इमारतीत प्रचंड धूर साचल्याने जवानांना आग विझवण्यात अडचणी आल्या. तीन बंबांसह अन्य आधुनिक उपकरणे तैनात करण्यात आली होती. दुपारी सव्वाबारा वाजता या आगीला ‘स्तर १’ची घोषित करण्यात आले. या आगीच्या कारणांचा अग्निशमन विभाग आणि स्थानिक प्रशासन तपास करीत आहेत.