उल्हासनगर, ता. १४ (वार्ताहर) : उल्हासनगर कॅम्प ४ येथील रेल्वेस्थानक परिसरात प्रवाशांची वाट पाहत असलेल्या रिक्षाचालकावर एका युवकाने मिरची स्प्रे फवारल्यानंतर कड्याने डोक्यावर आणि तोंडावर बेधडक हल्ला केला.
रिक्षाचालक गणेश सपकाळ हे नेहमीप्रमाणे पहाटे ४ वाजता स्थानक परिसरातील रिक्षा रांगेत उभे होते. त्याचवेळी आजूबाजूला उभ्या असलेल्या इतर नागरिकांसह त्यांनाही अचानक खोकला आणि श्वास घेण्यास त्रास होऊ लागला. त्यांनी शंका व्यक्त करत जवळच असलेल्या इडली विक्रेत्याला विचारणा केली, चटणीमध्ये काही घातक रसायन आहे का? या चर्चेदरम्यान एक तरुण तेथे आला आणि त्याने स्पष्ट सांगितले की, त्यानेच हवेत मिरची स्प्रे फवारला आहे. हे ऐकून चकित झालेल्या गणेश यांनी त्याला स्पष्टीकरण विचारले. त्या तरुणाने संतप्त होत शिवीगाळ करत थेट गणेश यांच्या डोळ्यांत मिरची स्प्रे फवारला आणि हातातील कड्याने त्यांच्यावर बेधडक हल्ला केला. डोक्यावर व तोंडावर जोरदार मार बसल्याने ते गंभीर जखमी झाले. घटनेनंतर परिसरातील इतर रिक्षाचालकांनी हस्तक्षेप करत आरोपीला थांबवण्याचा प्रयत्न केला. मात्र, त्याने त्यांच्यावरही मिरची स्प्रे फवारून घटनास्थळावरून पळ काढला. जखमी गणेशला तत्काळ मध्यवर्ती रुग्णालयात दाखल केले. या प्रकारामुळे स्थानिक नागरिक आणि रिक्षाचालकांमध्ये भीतीचे वातावरण निर्माण झाले आहे. विठ्ठलवाडी पोलिस ठाण्यात संबंधित युवकाविरुद्ध गुन्हा दाखल केला आहे. परिसरातील सीसीटीव्ही फुटेज तपासून लवकरच आरोपीला अटक केली जाईल, अशी माहिती पोलिसांनी दिली आहे.