कासा, ता. १४ (बातमीदार) : डहाणू-नाशिक राज्य मार्गावरील कासादरम्यान असलेल्या सारणी, वधना आणि रानशेत परिसरातील रस्त्यावर अनेक मोऱ्या व पुलांची अवस्था अत्यंत जीर्ण झालेली आहे. या ठिकाणच्या पुलांवरील संरक्षक कठडे पूर्णतः तुटल्यामुळे वाहनचालकांसाठी गंभीर अपघाताचा धोका निर्माण झाला होता. स्थानिक नागरिकांनी वारंवार तक्रारी करून या मोऱ्या व पुलांची तातडीने दुरुस्ती करण्याची मागणी केली होती. याबाबत ‘सकाळ’मध्ये बातमी प्रसिद्ध झाल्यानंतर बांधकाम विभाग जागे झाले. सारणी येथील अपघाती वळणावर असलेल्या कालव्यावरील पुलाचे दोन्ही कठडे तुटलेले असल्यामुळे तिथे लोखंडी बॅरिकेड्स बसवण्याचे काम हाती घेतले. तसेच रानशेत महालक्ष्मी गडाजवळील कालव्याजवळदेखील बॅरिकेड्स बसवण्यात आले आहेत. या कामामुळे त्या भागातील अपघाताचा धोका काही प्रमाणात कमी झाल्याची माहिती मिळाली आहे.

उद्योगधंद्यांची वाढ, बंदरांची वाहतूक, तसेच दररोज चालणारी भाजीपाला, चिकू व मासेमारीशी संबंधित वाहने, मोठ्या प्रमाणातील ट्रक व इतर वाहने यामुळे या मार्गावरील वाहतुकीची घनता प्रचंड वाढली आहे, मात्र जीर्ण पुलांमुळे हे सर्व प्रवासी व वाहनचालक दिवसेंदिवस मोठ्या धोक्यात आहेत. सारणी येथील मोरीवर दोन वर्षांपूर्वी कठडा नसल्यामुळे दोन दुचाकीस्वार कालव्यात पडून मृत्युमुखी पडले होते. तसेच लग्नाच्या वऱ्हाडाचा टेम्पो याच ठिकाणी अपघातग्रस्त झाला होता. रानशेत परिसरात कालव्याजवळ कारचा मोठा अपघात झाला होता. त्यामुळे नागरिकांमध्ये भीतीचे वातावरण पसरले होते.

दरम्यान, डहाणू-चारोटी राज्य मार्गाला सिमेंट काँक्रीट बनवण्यासाठी मंजुरी मिळाली असून, पावसाळ्यानंतर कामास सुरुवात होईल, मात्र या कामासाठी लागणारा मोठा अवधी लक्षात घेता, स्थानिक नागरिक व वाहनचालकांनी मागणी केली आहे की, तोपर्यंत पुलांची व मोऱ्यांची तातडीने दुरुस्ती करावी.

आवश्यक उपाययोजनांना गती
बांधकाम विभागाचे अभियंता नवीन बारी यांनी सांगितले की, सारणी व रानशेत कालव्यावरील पुलांचे कठडे तुटले होते, त्यामुळे तिथे लोखंडी बॅरिकेड्स बसवण्यात आले आहेत. अजून काही ठिकाणी धोकादायक स्थिती आहे, तिथे आवश्यक उपाययोजना केली जाणार आहे.