आझाद मैदानावर भाडोत्रींचे तिरंगा आंदोलन
घाटकोपर, ता. १४ (बातमीदार) ः मागील सात वर्षांपासून बेघर भाडोत्रींच्या हक्काच्या घरासाठी लढणाऱ्या दुष्काळग्रस्त मराठवाडा विदर्भ खान्देश नागरी सेवा संघ ट्रस्टच्या माध्यमातून पुन्हा एकदा आंदोलनाची हाक दिली आहे. मंगळवारी (ता. १५) आझाद मैदानावर तिरंगा आंदोलन करण्यात येणार आहे. दोन हजार बेघर भाडोत्री कुटुंबांना ठाण्यातील मोकळ्या जमिनीचा प्रस्ताव मंत्रालयात मंजूर करणे, ही प्रमुख मागणी असणार आहे.
दुष्काळग्रस्त मराठवाडा विदर्भ खान्देश नागरी सेवा संघाचे अध्यक्ष धनराज थोरात यांच्या नेतृत्वाखालील तिरंगा आंदोलनात मुंबई, ठाणे, रायगड, पालघर, कल्याण, नवी मुंबई येथील बेघर भाडोत्री सहभागी होणार आहेत. धनराज थोरात यांच्या माध्यमातून गेल्या सात वर्षांपासून बेघर भाडोत्र्यांना हक्काचे घर मिळण्यासाठी आझाद मैदान येथे १८ वेळा मोर्चा आंदोलन करण्यात आला. तसेच यासंदर्भात मुंबईमध्ये चार वेळा घर हक्क परिषदेने लक्ष वेधले असून, ठाणे जिल्हाधिकारी कार्यालयावर नऊ वेळा मोर्चा काढण्यात आला. यासाठी आजी-माजी मुख्यमंत्री, केंद्रीय मंत्री, विरोधी पक्षनेते, २० आमदार, १० खासदार, विधान परिषद सदस्य आणि मंत्र्यांनी शिफारशीसह प्रस्ताव महसूल विभागाकडे पाठवलेला आहे. याबाबत कोकण विभाग अपर आयुक्त महसूल विभागाने ८८७ पानांचा चौकशी संचिका प्रस्ताव सादर केला आहे.
मंत्रालयातील ज -४ चा महसूल विभागाकडील प्रस्ताव मागवून तो कॅबिनेटमध्ये प्रस्ताव मंजूर करावा, अशी मागणी संघाने सरकारकडे केली आहे. हा प्रस्ताव मंजूर करण्यासाठी मंगळवारी (ता. १५) आझाद मैदानावर बेघर भाडोत्री सभासदांचे तिरंगा आंदोलन करण्याचे जाहीर केले आहे. याबाबत मुख्यमंत्री, उपमुख्यमंत्री, महसूल मंत्री, पालकमंत्र्यांनी दखल घ्यावी, अशी विनंती धनराज थोरात यांनी केली आहे.