प्रभाग रचना कार्यक्रम जाहीर
जिल्हा परिषदेसाठी कल्याणमधील एक गट घटला; शहापूरमध्ये एक गट वाढला

सकाळ वृत्तसेवा
ठाणे, ता. १४ : आगामी सार्वत्रिक निवडणुकांच्या पार्श्वभूमीवर ठाणे जिल्ह्यातील जिल्हा परिषद व पाच पंचायत समित्यांच्या निर्वाचक गणांची प्रारूप प्रभाग रचना जाहीर करण्यात आली आहे. या प्रारूप प्रभाग रचनेवर हरकती व सूचनासाठीची अंतिम मुदत २१ जुलै आहे. त्यानंतर येणाऱ्या हरकती व सूचनांचा विचार केला जाणार नसल्याचे जिल्हा प्रशासनाने स्पष्ट केले आहे. असे असले तरी, दुसरीकडे या प्रारूप प्रभाग रचनेत कल्याण येथील जिल्हा परिषदेचा एक गट घटला आहे, तर शहापूरमध्ये एका गटाची वाढ झाल्याची माहिती सूत्रांनी दिली.

ठाणे जिल्हा परिषद बरखास्त होऊन दोन ते अडीच वर्षांचा कार्यकाळ उलटून गेला आहे. अशातच आता स्थानिक स्वराज्य संस्था व जिल्हा परिषदेच्या सार्वत्रिक निवडणुकांसाठी हालचाली सुरू झाल्या आहेत. त्यात राज्य सरकारने यासाठी प्राधिकृत अधिकारी म्हणून ठाणे जिल्हाधिकारी यांची नियुक्ती केली आहे. अशातच ठाणे जिल्ह्यातील जिल्हा परिषद व पाच पंचायत समित्यांच्या निर्वाचक गणांची प्रारूप प्रभाग रचना सोमवारी (ता. १४ )जाहीर करण्यात आली आहे. यासंदर्भातील आदेश व त्याचा मसुदा ठाणे जिल्हाधिकारी कार्यालय, जिल्हा परिषद कार्यालय, तसेच कल्याण, भिवंडी, शहापूर, मुरबाड आणि अंबरनाथ येथील तहसीलदार व पंचायत समिती कार्यालयांच्या फलकावर प्रसिद्ध करण्यात येत आहे. प्रसिद्ध केलेल्या प्रारूप प्रभाग रचनेवर हरकत किंवा सूचना असल्यास त्या लेखी निवेदने, हरकती किंवा सूचना २१ जुलैपर्यंत ठाणे जिल्हाधिकारी कार्यालयाकडे सादर कराव्यात. यानंतर प्राप्त होणाऱ्या हरकती, सूचना किंवा निवेदने विचारात घेतले जाणार नाहीत, अशी माहिती जिल्हा प्रशासनाने दिली.

दरम्यान, ठाणे जिल्हा परिषदेचे ५३ गट व १०६ गण आहेत. या प्रारूप प्रभाग रचनेत पूर्वीप्रमाणेच प्रभाग रचना असणार आहे, मात्र कल्याण तालुक्यातील ते १४ गावे नवी मुंबई पालिकेत समाविष्ट झाल्यामुळे तेथील एक गट कमी झाला आहे. त्यामुळे पूर्वी कल्याणमध्ये सहा गट व १२ गण होते, तर आता त्यात घट झाल्याने पाच गट व १० गण असतील. तसेच शहापूर तालुक्यात पूर्वी १४ गट होते. त्यात एक गट व दोन गण वाढल्याने तेथील गटांची सख्या १५ तर गणांची संख्या ३० वर पोहोचणार आहे, अशी माहिती सूत्रांनी दिली.

मागील निवडणुकीत जिल्हा परिषदेतील गट व गणांची संख्या
तालुका गट गण
शहापूर १४ २८
मुरबाड ०८ १६
कल्याण ०६ १२
अंबरनाथ ०४ ०८
भिवंडी २१ ४२
एकूण ५३ १०६